টুৰ্ণামেণ্টৰ আৰম্ভণি বেয়া হোৱাৰ পাছত কঠিন সময়ৰ সন্মুখীন হোৱা কলকাতা নাইট ৰাইডাৰ্ছে প্লে অফৰ আশা সজীৱ ৰাখিবলৈ বিচাৰিলে কাইলৈ মুম্বাই ইণ্ডিয়ানছৰ বিৰুদ্ধে ভাল প্ৰদৰ্শন কৰিব লাগিব। ইতিমধ্যে প্লে অফৰ দৌৰৰ পৰা বাহিৰ হৈছে মুম্বাই ইণ্ডিয়ানছ যদিও কেকেআৰৰ সুযোগ বিচলিত কৰিবলৈ দৃঢ়প্ৰতিজ্ঞ। যদিহে কেকেআৰে এই মেচত পৰাস্ত হয়, তেন্তে অজিংক্য ৰাহানেৰ নেতৃত্বত একেৰাহে দ্বিতীয়টো ছিজন হ’ব যে তেওঁলোকৰ দলটোৱে প্লে অফত প্ৰৱেশ কৰিবলৈ ব্যৰ্থ হৈছে। শ্ৰেয়াছ আয়াৰৰ নেতৃত্বত খিতাপ জয় কৰাৰ এবছৰৰ পাছত ২০২৫ চনত কেকেআৰে অষ্টম স্থান দখল কৰে। আনকি মুম্বাইৰ বিৰুদ্ধে জয়লাভ কৰিলেও কেকেআৰৰ আশা সম্পূৰ্ণ নহ’ব। তেওঁলোকৰ ভাগ্য এতিয়াও নিৰ্ভৰ কৰিব শনিবাৰে লক্ষ্ণৌ ছুপাৰ জায়েন্টছ আৰু পঞ্জাব কিংছৰ মাজত অনুষ্ঠিত হ’বলগীয়া খেলখনৰ ওপৰত।
সেই মেচখনত যদি পঞ্জাবে জয়লাভ কৰে তেন্তে দেওবাৰে দিল্লী কেপিটেলছৰ বিৰুদ্ধে কেকেআৰৰ লীগৰ অন্তিমখন খেল কেৱল আনুষ্ঠানিকতাহে হ’ব। ডিফেণ্ডিং চেম্পিয়ন ৰয়েল চেলেঞ্জাৰছ বেংগালুৰু, গুজৰাট টাইটানছ, আৰু ছানৰাইজাৰ্ছ হায়দৰাবাদে ইতিমধ্যে প্লে অফৰ স্থান নিশ্চিত কৰাৰ বিপৰীতে লক্ষ্ণৌ ছুপাৰ জায়েণ্টছ আৰু মুম্বাই ইণ্ডিয়ানছ বাহিৰ হৈছে। ইয়াৰ ফলত পাঁচটা দল পঞ্জাব কিংছ (১৩ পইণ্ট), ৰাজস্থান ৰয়েলছ (১২), চেন্নাই ছুপাৰ কিংছ (১২), দিল্লী কেপিটেলছ (১২), আৰু কলকাতা নাইট ৰাইডাৰ্ছ (১১) প্লে অফৰ বাকী স্থানৰ বাবে প্ৰতিদ্বন্দ্বিতা কৰিবলগীয়া হৈছে। ইয়াৰে মাত্ৰ ৰাজস্থান ৰয়েলছ আৰু কে কে আৰৰ মাজত দুখন মেচ বাকী আছে। ৰাজস্থানৰ বাবে আটাইতকৈ সহজ সমীকৰণ হ’ল লক্ষ্ণৌ আৰু মুম্বাইৰ বিৰুদ্ধে বাকী থকা দুয়োখন মেচতে জয়ী হৈ ১৬ পইণ্টৰ বাবে যোগ্যতা অৰ্জন কৰা।
আনহাতে কেকেআৰে দুয়োখন মেচতে জয়ী হোৱাই নহয়, লক্ষ্ণৌৰ হাতত পঞ্জাৱ পৰাস্ত হোৱাৰ আশাও কৰিব লাগিব। কেকেআৰতকৈ পঞ্জাৱৰ নেট ৰান ৰেট ভাল। যোৱা ছয়খন মেচৰ ভিতৰত পাঁচখন খেলত কেকেআৰে জয়লাভ কৰিছে যদিও প্ৰতিযোগিতাখনৰ আৰম্ভণিতে দেখা দিয়া দুৰ্বল প্ৰদৰ্শনে দলটোক যথেষ্ট আঘাত কৰিছে। অধিনায়ক ৰাহানে আৰু প্ৰশিক্ষক অভিষেক নায়াৰৰ বাবে বিজয়ী সংমিশ্ৰণৰ সিদ্ধান্ত ল’বলৈ প্ৰায় সাতখন খেলৰ প্ৰয়োজন হৈছিল। ফিন এলেনে পুনৰ ক্ৰমৰ শীৰ্ষত নিজৰ ফৰ্ম লাভ কৰিছে। যোৱা তিনিটা ইনিংছত শতক আৰু ফোহাৰ দৰে ৯৩ ৰান সংগ্ৰহ কৰাৰ বিপৰীতে যুৱ উইকেটকীপাৰ বেটছমেন অংকৃশ ৰঘুবংশী আৰু কেমেৰন গ্ৰীণৰ প্ৰতিখন মেচৰ লগে লগে আত্মবিশ্বাস বাঢ়িছে। শীৰ্ষ অৰ্ডাৰত ৰাহানে একমাত্ৰ দুৰ্বল লিংক হৈ আহিছে যদিও মিডল অৰ্ডাৰত ফিনিছাৰ হিচাপে প্ৰশংসনীয় প্ৰদৰ্শন আগবঢ়াইছে উপ অধিনায়ক ৰিংকু সিঙে। মথিছা পাথিৰানা আৰু বৰুণ চক্ৰৱৰ্তীৰ আঘাত বলিং বিভাগত কেকেআৰৰ বাবে চিন্তাৰ বিষয়।
