পশ্চিম বংগত শেহতীয়া নিৰ্বাচন পৰৱৰ্তী হিংসাত্মক ঘটনা আৰু দলীয় নেতা-কৰ্মীৰ ওপৰত হোৱা ধাৰাবাহিক আক্ৰমণৰ প্ৰতিবাদত মঙলবাৰে কলকাতাৰ ৰাজপথত এক ধৰ্না কাৰ্যসূচী ৰূপায়ণ কৰে তৃণমূল কংগ্ৰেছৰ মুৰব্বী মমতা বেনাৰ্জীয়ে। শেহতীয়া বিধানসভা নিৰ্বাচনত ভাৰতীয় জনতা পাৰ্টীৰ বিজয়ৰ পিছৰে পৰা ৰাজ্যখনত তৃণমূল কংগ্ৰেছৰ লোকসকলক লক্ষ্য কৰি লোৱা হৈছে বুলি অভিযোগ উত্থাপন কৰি তেওঁ দিনজোৰা প্ৰতিবাদ সাব্যস্ত কৰে।
কলকাতা আৰক্ষীয়ে ৰাণী ৰাসমণি ৰোডত প্ৰতিবাদ সাব্যস্ত কৰাৰ অনুমতি প্ৰদান নকৰাৰ পিছত বেনাৰ্জীয়ে এক্সপ্লেনেডৰ ৱাই-চেনেলত উপস্থিত হৈ এই ধৰ্না আৰম্ভ কৰে। প্ৰশাসনে বাধা প্ৰদান কৰা সন্দৰ্ভত ক্ষোভ প্ৰকাশ কৰি সমবেত ৰাইজক উদ্দেশ্যি মমতা বেনাৰ্জীয়ে কয়, “আমাক ইয়াত কোনো মঞ্চ তৈয়াৰ কৰিবলৈ বা মাইক্ৰ’ফোন ব্যৱহাৰ কৰিবলৈ অনুমতি দিয়া হোৱা নাই।” আৰক্ষীৰ এনে ভূমিকাৰ পিছতো তেওঁ এটা মেগাফোনৰ জৰিয়তে কৰ্মীসকলক সম্বোধন কৰে।
যোৱা শনিবাৰে দলৰ ৰাষ্ট্ৰীয় সাধাৰণ সম্পাদক তথা সাংসদ অভিষেক বেনাৰ্জীৰ ওপৰত হোৱা আক্ৰমণ, নিৰ্বাচন পৰৱৰ্তী হিংসা আৰু হকাৰ উচ্ছেদৰ বিৰুদ্ধে এই প্ৰতিবাদ সূচী গ্ৰহণ কৰে মমতাই। প্ৰাক্তন মুখ্যমন্ত্ৰীগৰাকীয়ে স্পষ্ট কৰা অনুসৰি, এই ধৰ্না কাৰ্যসূচী নিৰ্ধাৰিত সময়সূচী অনুসৰি সন্ধিয়ালৈকে অব্যাহত থাকিব। এই প্ৰতিবাদী কাৰ্যসূচীত প্ৰাক্তন মুখ্যমন্ত্ৰীগৰাকীৰ সৈতে দলৰ জ্যেষ্ঠ নেতা ফিৰহাদ হাকিম, মদন মিত্ৰ, ডেৰেক অ’ব্ৰায়েন, কল্যাণ বেনাৰ্জী আৰু দোলা সেন উপস্থিত থাকে। অৱশ্যে বিধানসভা নিৰ্বাচনত জয়লাভ কৰা তৃণমূল কংগ্ৰেছৰ নতুন মুখসমূহৰ সৰহ সংখ্যকেই এই ধৰ্নাত অনুপস্থিত থকাটো এক চৰ্চাৰ বিষয় হৈ পৰিছে।
