অসমৰ মুখ্যমন্ত্ৰী হিমন্ত বিশ্ব শৰ্মাই দেওবাৰে কয় যে কংগ্ৰেছে অনুপ্ৰৱেশকাৰীক সুৰক্ষা দিবলৈ ভোটাৰ তালিকাৰ বিশেষ নিবিড় সংশোধন (SIR)ৰ বিৰোধিতা কৰিছে।
শিমলাত বিজেপিৰ ‘গণতন্ত্ৰ বচাওক, নৈৰাজ্য শেষ কৰক’ সমাৱেশত ভাষণ দি শৰ্মাই কয়, “অনুপ্ৰৱেশৰ বিষয়টো বহু ৰাজ্যত এক গুৰুতৰ চিন্তাৰ বিষয়— যিটো কথা উচ্চতম ন্যায়ালয়ৰ পৰা সংসদলৈকে বিভিন্ন প্ৰতিষ্ঠানে স্বীকাৰ কৰিছে। বিৰোধীয়ে অনুপ্ৰৱেশকাৰীক চিনাক্ত কৰি তেওঁলোকৰ নাম ভোটাৰ তালিকাৰ পৰা আঁতৰোৱাৰ প্ৰক্ৰিয়াৰ বিৰোধিতা কৰিছে, ফলপ্ৰসূভাৱে তেওঁলোকক সুৰক্ষা দিবলৈ চেষ্টা কৰিছে।”
বংগ আৰু অসমৰ দৰে ৰাজ্যই অনুপ্ৰৱেশৰ সৈতে যুঁজি আছে বুলি উল্লেখ কৰি শৰ্মাই প্ৰশ্ন কৰে যে অনুপ্ৰৱেশকাৰীক চিনাক্ত কৰি তেওঁলোকৰ নাম আঁতৰোৱাৰ প্ৰক্ৰিয়া যদি চলোৱা নহয় তেন্তে এই সমস্যা কেনেদৰে সমাধান হ’ব। তেওঁ কয়, “চলি থকা এই কচৰৎটো এনে ‘অনুপ্ৰৱেশকাৰী’ৰ নাম আঁতৰোৱাৰ লক্ষ্যৰে কৰা হৈছে— যেনে বাবৰ আৰু ঔৰংজেব। তথাপিও কংগ্ৰেছে তেওঁলোকক সুৰক্ষা দিবলৈ চেষ্টা কৰিছে।”
নিৰ্বাচন আৰু গণতন্ত্ৰ সন্দৰ্ভত ৰাহুল গান্ধীৰ শেহতীয়া মন্তব্যৰ সন্দৰ্ভত শৰ্মাই আঙুলিয়াই দিয়ে যে লোকসভাৰ বিৰোধী দলৰ নেতাজনে ২০২৪ৰ নিৰ্বাচন বাতিল কৰাৰ কথা কৈছে যদিও তেওঁ প্ৰশ্ন কৰে যে হিমাচল প্ৰদেশ আৰু কেৰালাত অনুষ্ঠিত নিৰ্বাচনো বাতিল কৰিব লাগে নেকি। ৰায়বেৰেলীৰ পৰা তেওঁৰ নিজৰ নিৰ্বাচনো বাতিল কৰিব লাগে নেকি সেই বিষয়েও ৰাহুল গান্ধীয়ে স্পষ্ট কৰিব লাগে বুলি তেওঁ কয়।
বিশেষ অতিথি হিচাপে এই সমাৱেশত অংশগ্ৰহণ কৰা শৰ্মাৰ লগত বিধানসভাৰ বিৰোধী দলৰ নেতা জয়ৰাম ঠাকুৰ, বিজেপিৰ ৰাজ্যিক গোটৰ সভাপতি ৰাজীৱ বিন্দল, সাংসদ অনুৰাগ ঠাকুৰ আৰু সুৰেশ কাশ্যপৰ লগতে আন কেইবাজনো জ্যেষ্ঠ দলীয় নেতা, বিধায়ক, বিষয়ববীয়া আৰু হাজাৰ হাজাৰ দলীয় কৰ্মী উপস্থিত আছিল।
