আপুনিও যদি গৰম গৰম চিঙৰা বা পথৰ কাষৰ সোৱাদযুক্ত ‘বড়া পাও’ বাতৰি কাকতৰ টুকুৰাত মেৰিয়াই খোৱাৰ অভ্যাস কৰিছে, তেন্তে এতিয়াই সাৱধান হোৱাৰ সময় আহি পৰিছে। আপোনাৰ এই প্ৰিয় অভ্যাসে অলক্ষিতে শৰীৰলৈ কঢ়িয়াই আনিব পাৰে মাৰাত্মক স্বাস্থ্যৰ সংকট। শেহতীয়াকৈ বাণিজ্য চহৰ মুম্বাইত খাদ্য সুৰক্ষা প্ৰাধিকৰণে বাতৰি কাকত বা তেনে ধৰণৰ ছপা কাগজত খাদ্য সামগ্ৰী বিক্ৰী কৰাৰ বিৰুদ্ধে এক ব্যাপক অভিযান আৰম্ভ কৰাৰ পাছতে এতিয়া সমগ্ৰ মহানগৰখনৰ পথৰ কাষৰ খাদ্য ব্যৱসায়ীসকলৰ মাজত তীব্ৰ চাঞ্চল্যৰ সৃষ্টি হৈছে।
ভাৰতীয় খাদ্য সুৰক্ষা আৰু মান প্ৰাধিকৰণৰ (FSSAI) নিয়ম অনুসৰি, যিকোনো ধৰণৰ খাদ্য মেৰিয়াবলৈ বা গ্ৰাহকক পৰিৱেশন কৰিবলৈ পুৰণি বাতৰি কাকত, আলোচনী বা ছপা কাগজ ব্যৱহাৰ কৰাটো সম্পূৰ্ণৰূপে নিষিদ্ধ। এই নিয়ম কঠোৰভাৱে বলবৎ কৰাৰ উদ্দেশ্যেৰে স্থানীয় প্ৰাধিকৰণৰ বিষয়াসকলে চহৰখনৰ বহুকেইখন হোটেল, ৰেষ্টুৰেণ্ট আৰু ‘বড়া পাও’ বিক্ৰেতাৰ দোকানত অলপতে আকস্মিক পৰিদৰ্শন চলায়। চাবুকসদৃশ এই অভিযানৰ মূল লক্ষ্যই হৈছে ছপা কাগজৰ চিয়াহী আৰু কেমিকেলৰ পৰা সাধাৰণ গ্ৰাহকৰ স্বাস্থ্য সুৰক্ষিত ৰখা।
বিশেষজ্ঞসকলে সতৰ্ক কৰি দিয়া অনুসৰি, বাতৰি কাকতত ব্যৱহাৰ কৰা ৰং, চিয়াহী আৰু অন্যান্য ৰাসায়নিক পদাৰ্থসমূহ অতি সহজে খাদ্যৰ সংস্পৰ্শলৈ আহে। বিশেষকৈ গৰম আৰু তেলজাতীয় খাদ্য সামগ্ৰী যেতিয়া এনে কাগজত ৰখা হয়, তেতিয়া চিয়াহীত থকা ক্ষতিকাৰক উপাদানবোৰে সমগ্ৰ খাদ্য বিষাক্ত কৰি তোলে। পৰিদৰ্শনৰ সময়ত প্ৰাধিকৰণৰ বিষয়াসকলে ব্যৱসায়ীসকলক এই ভয়ংকৰ স্বাস্থ্যজনিত বিপদৰ বিষয়ে অৱগত কৰাৰ লগতে ইয়াৰ বিকল্প হিচাপে ‘ফুড-গ্ৰেড’ কাগজ বা বাটাৰ পেপাৰ ব্যৱহাৰ কৰিবলৈ কঠোৰভাৱে নিৰ্দেশ দিয়ে।
উল্লেখ্য যে মুম্বাই চহৰত যুগ যুগ ধৰি ‘বড়া পাও’ বা পাও ভাজি আদি পথৰ কাষৰ খাদ্যসমূহ বাতৰি কাকতত মেৰিয়াই গ্ৰাহকক দিয়াটো এটা পৰম্পৰাগত সস্তীয়া মাধ্যম হিচাপে চলি আহিছিল। কিন্তু খাদ্য সুৰক্ষা প্ৰাধিকৰণে স্পষ্ট কৰি দিয়ে যে জনস্বাস্থ্যৰ বিনিময়ত কোনো ধৰণৰ পুৰণি পৰম্পৰা বজাই ৰাখিব নোৱাৰি। পেকেজিঙৰ খৰচ অলপ বৃদ্ধি পোৱাক লৈ কিছুসংখ্যক ক্ষুদ্ৰ ব্যৱসায়ীয়ে চিন্তা প্ৰকাশ কৰিছে যদিও গ্ৰাহকৰ নিৰাপত্তাৰ স্বাৰ্থত এই নিয়ম সকলোৱে মানি চলিবই লাগিব। অনাগত দিনত এই নিয়ম উলংঘা কৰা বিক্ৰেতাৰ বিৰুদ্ধে চৰকাৰী আইন অনুসৰি জৰিমনা বা গ্ৰেপ্তাৰৰ দৰে শাস্তিৰ ব্যৱস্থা গ্ৰহণ কৰিব এই নিয়ন্ত্ৰক প্ৰাধিকৰণে।
