ভাৰতীয় ক্ৰীড়া প্ৰশাসনৰ সৈতে জড়িত এক উল্লেখযোগ্য আইনী ঘটনাক্ৰমত কেন্দ্ৰীয় তথ্য আয়োগে ৰায় দিছে যে ভাৰতত ক্ৰিকেট নিয়ন্ত্ৰণ ব’ৰ্ড (বিচিচিআই) তথ্যৰ অধিকাৰ আইন, ২০০৫ৰ অধীনত নাহে।আৰ টি আই আইনৰ অধীনত ইয়াক ৰাজহুৱা কৰ্তৃপক্ষ বুলি গণ্য কৰা নহ’ব। তথ্য আয়ুক্ত পি.আৰ ৰমেশৰ এই আদেশে বিশ্বৰ ধনী ক্ৰিকেট সংস্থাটোক আৰ টি আইৰ অধীনত বাধ্যতামূলক তথ্য প্ৰকাশৰ পৰা ৰেহাই দিছে। এইদৰে কেন্দ্ৰীয় তথ্য আয়োগে পূৰ্বৰ সিদ্ধান্ত বাতিল কৰিছে। উল্লেখযোগ্য যে ২০১৮ চনত পূৰ্বৰ তথ্য আয়ুক্ত এম শ্ৰীধৰ আচাৰ্যুলুৱে বি চি চি আইক ৰাজহুৱা কৰ্তৃপক্ষ হিচাপে ঘোষণা কৰি বি চি চি আইক এজন তথ্য বিষয়া নিযুক্তি দিবলৈ নিৰ্দেশ দিছিল। পৰৱৰ্তী সময়ত বিচিচিআইয়ে কেন্দ্ৰীয় তথ্য আয়োগৰ এই সিদ্ধান্তক মাদ্ৰাজ উচ্চ ন্যায়ালয়ত প্ৰত্যাহ্বান জনায়। উচ্চতম ন্যায়ালয়ৰ সিদ্ধান্তৰ পোহৰত এই বিষয়টো পুনৰ বিবেচনাৰ বাবে চিআইচিলৈ প্ৰেৰণ কৰে মাদ্ৰাজ উচ্চ ন্যায়ালয়ে। আজি জাৰি কৰা আদেশত আয়োগে উল্লেখ কৰিছে যে বিচিচিআইয়ে ধাৰা ২(এইচ)ৰ সংজ্ঞা পূৰণ নকৰে। ই তামিলনাডু ছ’চাইটিজ ৰেজিষ্ট্ৰেচন এক্টৰ অধীনত পঞ্জীয়নভুক্ত সংস্থা, যিটো সংবিধানে প্ৰতিষ্ঠা কৰা নাছিল, সংসদৰ কোনো আইনৰ দ্বাৰাও সৃষ্টি হোৱা নাছিল।
থালাপ্পালাম চাৰ্ভিচ কোঅপাৰেটিভ বেংক বনাম ষ্টেট অৱ কেৰালা আৰু জি টেলিফিল্মছ বনাম ইউনিয়ন অৱ ইণ্ডিয়া আদি উচ্চতম ন্যায়ালয়ৰ সিদ্ধান্তৰ উদ্ধৃতি দি চিআইচিয়ে বিচিচিআইৰ ব্যক্তিগত আৰু স্বায়ত্তশাসিত মৰ্যাদা পুনৰবাৰ উল্লেখ কৰে।কেন্দ্ৰীয় তথ্য আয়োগে বিচিচিআইৰ ওপৰত চৰকাৰৰ কোনো গভীৰ বা ব্যাপক নিয়ন্ত্ৰণ নাই বুলি ধৰা পেলাইছে। একেদৰে সংবাদ মাধ্যমৰ অধিকাৰ, পৃষ্ঠপোষকতা, টিকট বিক্ৰীৰ পৰা ব’ৰ্ডে নিজাকৈ ৰাজহ আহৰণ কৰে। কৰ ৰেহাই বা আইনী ৰেহাইক “উল্লেখযোগ্য বিত্তীয় সাহায্য” বুলি গণ্য কৰা নহ’ব। আয়োগে পৰ্যবেক্ষণ কৰে যে ভাৰতীয় বজাৰ আৰু আই পি এলৰ সফলতাৰ দ্বাৰা পৰিচালিত বি চি চি আই এক ঔপনিৱেশিক প্ৰতিষ্ঠানৰ পৰা বিশ্ব ক্ৰিকেটৰ বিত্তীয় কেন্দ্ৰলৈ বিকশিত হৈছে। আয়ুক্ত ৰমেশে কয় যে কেৱল চৰকাৰী নিয়ন্ত্ৰণ জাপি দিলে এই সুষম অৰ্থনৈতিক গাঁথনিত ব্যাঘাত জন্মিব পাৰে।বি চি চি আইক আৰ টি আইৰ পৰিসৰৰ অধীনলৈ অনাৰ বিষয়টো তেতিয়াই উদ্ভৱ হৈছিল যেতিয়া ক্ৰীড়া মন্ত্ৰালয়ে আৰ টি আইৰ আবেদন লাভ কৰিছিল।
মন্ত্ৰালয়ে উল্লেখ কৰে যে তেওঁলোকৰ হাতত এই তথ্য নাই আৰু বিচিচিআই এটা ব্যক্তিগত সত্তা। এই আদেশৰ পৰা স্পষ্ট হৈ পৰিছে যে বি চি চি আইক আৰ টি আই আইনৰ পৰিসৰৰ অধীনলৈ অনাৰ বাবে সংসদে নতুন আইন প্ৰণয়ন কৰিব লাগিব বা চৰকাৰে বিশেষ আদেশ জাৰি কৰিব লাগিব। বিচিচিআই বৰ্তমানৰ আইনখনৰ সংজ্ঞাৰ লগত খাপ নাখায়। আয়োগে কয় যে ইমান বৃহৎ আৰু আৰ্থিকভাৱে চাৰ্জড ক্ৰীড়া ব্যৱস্থাত কেৱল চৰকাৰী নিয়ন্ত্ৰণৰ জৰিয়তে ন্যায়পৰায়ণতা লাভ কৰিব নোৱাৰি। ইয়াৰ বাবে বিচিচিআইয়ে নিজৰ কাৰ্য্যকলাপত স্বচ্ছতা বজাই ৰাখিব লাগিব, জবাবদিহিতা নিশ্চিত কৰিব লাগিব, আৰু নিয়মসমূহ চিন্তাশীলভাৱে বলবৎ কৰাটো নিশ্চিত কৰিব লাগিব।
