কেন্দ্ৰীয় চৰকাৰৰ নীতি আয়োগৰ অন্যতম উপাধ্যক্ষ হিচাপে মনোনীত হ’ল বিশিষ্ট অৰ্থনীতিবিদ তথা পশ্চিমবংগৰ বালুৰঘাট সমষ্টিৰ বিদায়ী বিজেপি বিধায়ক অশোক লাহিড়ী। প্ৰধানমন্ত্ৰী নৰেন্দ্ৰ মোদীৰ নেতৃত্বত শুকুৰবাৰে গ্ৰহণ কৰা এই সিদ্ধান্তত অশোক লাহিড়ীৰ লগতে বিজ্ঞানী গোবৰ্ধন দাসকো নীতি আয়োগৰ সদস্য হিচাপে নিযুক্তি দিয়া হয়। যোৱা বিধানসভা নিৰ্বাচনৰ প্ৰাৰ্থী তালিকাত নাম নথকাক লৈ সৃষ্টি হোৱা জল্পনা-কল্পনাৰ অন্ত পেলাই এতিয়া এইগৰাকী অৰ্থনীতিবিদক ৰাষ্ট্ৰীয় পৰ্যায়ত এক বিশেষ গুৰুত্বপূৰ্ণ আসনত অধিষ্ঠিত কৰে কেন্দ্ৰীয় চৰকাৰে।
প্ৰণিধানযোগ্য যে ২০২১ চনৰ পশ্চিমবংগ বিধানসভা নিৰ্বাচনত গেৰুৱা দলে অশোক লাহিড়ী আৰু গোবৰ্ধন দাসৰ দৰে কেইবাজনো বিদ্বান ব্যক্তিক নিৰ্বাচনী যুঁজত অৱতীৰ্ণ কৰাইছিল। এইসকলৰ ভিতৰত অৰ্থনীতিবিদ অশোক লাহিড়ীয়ে বালুৰঘাট সমষ্টিৰ পৰা বিজয়ী হৈ বিধানসভালৈ নিৰ্বাচিত হৈছিল। আনহাতে, জে এন ইউৰ অধ্যাপক তথা বিজ্ঞানী গোবৰ্ধন দাসে পূৰ্বস্থলী উত্তৰ সমষ্টিৰ পৰা প্ৰতিদ্বন্দ্বিতা কৰিছিল যদিও তেওঁ নিৰ্বাচনত পৰাজয়বৰণ কৰে।
ইফালে, ভাৰত চৰকাৰৰ অৰ্থনৈতিক উপদেষ্টা আৰু পঞ্চদশ বিত্তীয় আয়োগৰ সদস্য হিচাপে কাৰ্যনিৰ্বাহ কৰা অশোক লাহিড়ীৰ সৈতে প্ৰধানমন্ত্ৰী মোদীৰ সুসম্পৰ্কৰ কথা ৰাজনৈতিক মহলত সৰ্বজনবিদিত। বিশেষকৈ যোৱা ১৪ মাৰ্চৰ ব্ৰিগেড সমাৱেশত প্ৰধানমন্ত্ৰীগৰাকীয়ে তেওঁৰ সৈতে চলোৱা কথা-বাৰ্তাই এই ঘনিষ্ঠতাৰ ইংগিত বহন কৰিছিল। এই নিযুক্তিৰ জৰিয়তে কেন্দ্ৰীয় চৰকাৰে লাহিড়ীৰ দীৰ্ঘদিনীয়া অভিজ্ঞতাক দেশৰ নীতি নিৰ্ধাৰণৰ ক্ষেত্ৰত ব্যৱহাৰ কৰিবলৈ ইচ্ছা প্ৰকাশ কৰিছে।
অন্যহাতে, নীতি আয়োগৰ সদস্য হিচাপে নিযুক্তি লাভ কৰা বিজ্ঞানী গোবৰ্ধন দাসে বৰ্তমান স্কুল অফ মলিকুলাৰ মেডিচিনৰ অধ্যাপক হিচাপে কৰ্মৰত হৈ আছে। নিৰ্বাচনত পৰাজিত হ’লেও তেওঁৰ শৈক্ষিক আৰু বৈজ্ঞানিক প্ৰতিভাক সন্মান জনাই কেন্দ্ৰীয় চৰকাৰে এই গুৰুত্বপূৰ্ণ দায়িত্ব প্ৰদান কৰে। দেশৰ সৰ্বোচ্চ নীতি নিৰ্ধাৰণকাৰী সংস্থাত এই দুই বিশিষ্ট ব্যক্তিৰ অন্তৰ্ভুক্তিৰ পাছতে এতিয়া পশ্চিমবংগৰ বিজেপি শিবিৰতো এক বিশেষ উৎসাহ পৰিলক্ষিত হৈছে।
