চৰম একাকীত্ব তথা নিসংগতাৰ মানসিক অৱসাদত অৱশেষত একেলগে আত্মহননৰ পথ বাচি ল’লে দুই অশীতিপৰ বৃদ্ধাই। ৰাজধানী দিল্লীৰ অভিজাত নতুন ৰাজিন্দৰ নগৰ অঞ্চলত বৃহস্পতিবাৰে পুৱা এক বন্ধ কোঠাৰ ভিতৰৰ পৰা এই দুই আশী বছৰীয়া বৃদ্ধাৰ গলিত মৃতদেহ উদ্ধাৰ হোৱাৰ ঘটনাই এতিয়া সমগ্ৰ অঞ্চলটোতে এক তীব্ৰ চাঞ্চল্যৰ সৃষ্টি কৰিছে। সৰোজ বালা আৰু চন্দ্ৰ কান্তা নামৰ এই জা-ননদ দুগৰাকী দীৰ্ঘদিন ধৰি সমাজৰ পৰা আঁতৰি আছিল বুলি আৰক্ষীয়ে প্ৰকাশ কৰিছে।
তদন্তকাৰী বিষয়াৰ তথ্য অনুসৰি, প্ৰথম মহলাৰ এই বিশাল আৱাসটোৰ আটাইবোৰ প্ৰৱেশ দ্বাৰেই ভিতৰৰ পৰা সম্পূৰ্ণ তলাবন্ধ অৱস্থাত আছিল। ঘৰটোত কোনো ধৰণৰ জোৰ-জুলুম কৰি প্ৰৱেশ কৰা, লুটপাত চলোৱা বা হতাহতি হোৱাৰ কোনো চিন পৰিদৰ্শনকালত পোৱা হোৱা নাই। আৱাসটোৰ চোতাল চাফা কৰিবলৈ অহা এগৰাকী বনকৰা মহিলাই ঘৰটোৰ পৰা তীব্ৰ দুৰ্গন্ধ ওলোৱা পাই লগে লগে আৰক্ষীক খবৰ দিয়ে আৰু তাৰ পিছতে এই দৃশ্য পোহৰলৈ আহে।
ঘৰৰ ভিতৰত এগৰাকী বৃদ্ধাৰ মৃতদেহ বিছনাত আৰু আনগৰাকীৰ মজিয়াত পৰি থকা অৱস্থাত আৰক্ষীয়ে প্ৰত্যক্ষ কৰে। ওচৰ-চুবুৰীয়াই জানিবলৈ দিয়া মতে, দীৰ্ঘদিন ধৰি কোনো আত্মীয়ৰ আশ্ৰয় বা পাৰিবাৰিক সহযোগিতা অবিহনেই এই দুয়োগৰাকী বৃদ্ধাই জীৱন কটাই আছিল। কোনো আপোন মানুহ কাষত নথকা আৰু বাৰ্ধক্যজনিত অসুস্থতাৰ বাবে তেওঁলোক গভীৰ মানসিক অৱসাদৰ চিকাৰ হৈছিল বুলি স্থানীয় লোকে সন্দেহ কৰিছে।
আৰক্ষীয়ে জানিবলৈ দিয়া মতে, মৰণোত্তৰ পৰীক্ষাৰ প্ৰতিবেদন লাভ কৰাৰ পিছতহে মৃত্যুৰ প্ৰকৃত কাৰণ আৰু সঠিক সময় স্পষ্ট হ’ব। কোনো ধৰণৰ অপৰাধমূলক ষড়যন্ত্ৰৰ প্ৰমাণ পোৱা নগ’লেও, এই দুই বৃদ্ধাই চৰম মানসিক নিসংগতাৰ বাবেই কোনো বিষাক্ত দ্ৰব্য সেৱন কৰি আত্মহননৰ দৰে পথ বাচি ল’লে নেকি, সেই দিশটোক সৰ্বাধিক গুৰুত্ব দি বৰ্তমান এক বিতং তদন্ত চলাই থকা হৈছে।
