ভাৰতীয় ৰিজাৰ্ভ বেংকে ২০২৭ চনৰ পৰা পৰীক্ষামূলকভাৱে ‘পলিমাৰ’ অৰ্থাৎ প্লাষ্টিকৰ কাগজৰ টকা চলোৱাৰ সিদ্ধান্ত লৈছে। বিশেষকৈ সৰু সৰু টকাৰ নোটবোৰ সোনকালে ফালি যোৱা আৰু নষ্ট হোৱা সমস্যা সমাধানৰ বাবে এই পদক্ষেপ লোৱা হৈছে। ৰিজাৰ্ভ বেংকৰ গৱৰ্ণৰ সঞ্জয় মলহোত্ৰাই জনোৱা মতে, এই প্লাষ্টিকৰ নোটবোৰ সহজতে ফালি নাযায়।
এইবোৰ পানী আৰু লেতেৰা বস্তুৰ পৰা সুৰক্ষিত হৈ থাকে। লগতে নকলী নোট তৈয়াৰ কৰাটো ৰোধ কৰিবলৈ ইয়াত উন্নত নিৰাপত্তা ব্যৱস্থা থাকিব। বিশ্বৰ ৬০ খনতকৈও অধিক দেশত (যেনে— অষ্ট্ৰেলিয়া, কানাডা, ব্ৰিটেইন আৰু ছিংগাপুৰ) ইতিমধ্যে এনে প্লাষ্টিকৰ নোট ব্যৱহাৰ হৈ আছে।
এই নোটবোৰ সাধাৰণ কাগজৰ নোটতকৈ বহু বছৰ বেছি দিন প্ৰচলন হৈ থাকে, যাৰ বাবে চৰকাৰৰ নতুন নোট ছপা কৰাৰ খৰচ হ্ৰাস পাব। ভাৰতৰ গৰম আৰু বৰষুণৰ বতৰত এই নোটবোৰ কিমান উপযোগী হয়, ৰিজাৰ্ভ বেংকে প্ৰথমে সেয়া পৰীক্ষা কৰি চাব। এই পৰীক্ষা সফল হ’লে অতি সোনকালে সকলোৰে হাতত এই নতুন নোট দেখা পোৱা যাব।
