মুখ্যমন্ত্ৰী ড° হিমন্ত বিশ্ব শৰ্মা নেতৃত্বাধীন দ্বিতীয়টো কাৰ্যকালৰ নতুন মন্ত্ৰীসভাৰ দপ্তৰসমূহ বৃহস্পতিবাৰে আনুষ্ঠানিকভাৱে আবণ্টন কৰে চৰকাৰে। বুধবাৰে শপত গ্ৰহণ কৰা মন্ত্ৰীসকলৰ মাজত বিভাগসমূহ বিতৰণ কৰি ৰাজভৱনৰ পৰা এক চৰকাৰী জাননী জাৰি কৰা হৈছে। এই নতুন তালিকাত মিত্ৰজোঁটৰ জ্যেষ্ঠ নেতা তথা মন্ত্ৰী অতুল বৰাক পঞ্চায়ত আৰু গ্ৰামোন্নয়নৰ লগতে আবকাৰী, অসম চুক্তি ৰূপায়ন আৰু সীমান্ত সুৰক্ষা তথা উন্নয়ন বিভাগৰ দায়িত্ব অৰ্পণ কৰে মুখ্যমন্ত্ৰীয়ে।
কেবিনেটৰ আন গুৰুত্বপূৰ্ণ বিভাগসমূহৰ ভিতৰত চৰণ বড়োক পৰিবহণ আৰু বড়োলেণ্ড উন্নয়ন বিভাগৰ দায়িত্ব দিয়া হৈছে। জ্যেষ্ঠ মন্ত্ৰী অজন্তা নেওগে লাভ কৰিছে পৰ্যটনৰ লগতে মহিলা আৰু শিশু বিকাশ বিভাগৰ দায়িত্ব। আনহাতে, প্ৰাক্তন কেন্দ্ৰীয় মন্ত্ৰী ৰামেশ্বৰ তেলীক শ্ৰমিক কল্যাণ, ৰূপান্তৰ আৰু উন্নয়নৰ লগতে চাহ আৰু জনজাতি উন্নয়ন বিভাগৰ গুৰুত্বপূৰ্ণ দায়িত্ব দিছে চৰকাৰে। নতুন চৰকাৰৰ এই কাৰ্যকালত তৃণমূল পৰ্যায়ৰ কাম-কাজত অধিক গতিশীলতা অনাৰ বাবে বিভাগসমূহ এনেদৰে ভাগ কৰা হৈছে।
প্ৰশাসনৰ বিকেন্দ্ৰীকৰণ আৰু নিৰ্বাচনী প্ৰতিশ্ৰুতিসমূহ খৰতকীয়াভাৱে ৰূপায়ন কৰাৰ লক্ষ্যৰে এইবাৰ বিভাগসমূহৰ দায়িত্ব দিয়া হৈছে। বিশেষকৈ চাহ জনজাতি আৰু সীমান্ত উন্নয়নৰ দৰে সংবেদনশীল বিভাগবোৰত অভিজ্ঞতা সম্পন্ন নেতাক অগ্ৰাধিকাৰ দিছে মুখ্যমন্ত্ৰীয়ে। আজিৰ এই দপ্তৰ বিতৰণৰ পাছতে শুকুৰবাৰৰ পৰা নতুন মন্ত্ৰীসকলে নিজ নিজ কাৰ্যালয়ত আনুষ্ঠানিকভাৱে কাৰ্যভাৰ গ্ৰহণ কৰিব বুলি চৰকাৰী সূত্ৰই প্ৰকাশ কৰিছে।
