অহা কেইটামান মাহৰ ভিতৰত অনুষ্ঠিত হ’বলগীয়া অসম বিধানসভা নিৰ্বাচনৰ বাবে তৎপৰ হৈ পৰিছে ৰাজ্যৰ মুখ্য বিৰোধী দল কংগ্ৰেছ। বিজেপিৰ নেতৃত্বাধীন মিত্ৰজোঁটক পৰাস্ত কৰি পুনৰ শাসনৰ গাদী দখলৰ লক্ষ্যৰে মঙলবাৰে দলটোৱে ঘোষণা কৰে ৩৫ জনীয়া এক শক্তিশালী প্ৰদেশ নিৰ্বাচনী কমিটি। অসম প্ৰদেশ কংগ্ৰেছ কমিটিৰ সভাপতি গৌৰৱ গগৈক এই গুৰুত্বপূৰ্ণ কমিটিৰ অধ্যক্ষ হিচাপে নিযুক্তি দি দলটোৱে নিজৰ নিৰ্বাচনী ৰণকৌশল অধিক স্পষ্ট কৰি তুলিছে।
নতুনকৈ গঠিত এই উচ্চস্তৰীয় পেনেলখনত দলৰ কেইবাজনো জ্যেষ্ঠ নেতা তথা অভিজ্ঞ মুখক স্থান দিয়া হৈছে। ইয়াৰ ভিতৰত বিৰোধী দলপতি দেৱব্ৰত শইকীয়া, ৰকিবুল হুছেইন, প্ৰদ্যুৎ বৰদলৈ, ভূপেন কুমাৰ বৰা, ৰিপুন বৰা আৰু পৱন সিং ঘাটোৱাৰৰ দৰে প্ৰভাৱশালী নেতাৰ নাম বিশেষভাৱে উল্লেখযোগ্য। ইয়াৰ উপৰিও ৱাজিদ আলী চৌধুৰী, ৰ’জলিনা তিৰ্কী, জাকিৰ হুছেইন শিকদাৰ, প্ৰদীপ চৰকাৰ আৰু অৰুণ দত্ত মজুমদাৰকো এই সমিতিত অন্তৰ্ভুক্ত কৰি দলটোৱে বিভিন্ন জনগোষ্ঠী আৰু অঞ্চলক প্ৰতিনিধিত্ব কৰাৰ প্ৰয়াস কৰিছে।
কেৱল জ্যেষ্ঠ নেতাই নহয়, এই নিৰ্বাচনী সমিতিত প্ৰদেশ কংগ্ৰেছৰ সাধাৰণ সম্পাদক (সংগঠন), সকলো ফ্ৰণ্টেল অৰ্গেনাইজেচনৰ মুৰব্বীসকলৰ লগতে অনুসূচিত জাতি, অন্যান্য পিছপৰা শ্ৰেণী, সংখ্যালঘু আৰু আদিবাসী কংগ্ৰেছ বিভাগৰ অধ্যক্ষসকলকো সদস্য হিচাপে ৰখা হৈছে। বিশেষকৈ চাহ জনজাতীয় চেলৰ মুৰব্বীক অন্তৰ্ভুক্ত কৰি চাহ বাগান অঞ্চলৰ ভোটাৰক আকৰ্ষিত কৰাৰ বাবে দলটোৱে এক সুকীয়া কৌশল গ্ৰহণ কৰা পৰিলক্ষিত হৈছে।
কংগ্ৰেছ নেতৃত্বই জনোৱা মতে, এই নবগঠিত পেনেলখনে সমগ্ৰ ৰাজ্যতে নিৰ্বাচনী কৌশল নিৰ্ধাৰণ, প্ৰাৰ্থী বাছনি আৰু প্ৰচাৰ অভিযানৰ সমন্বয় ৰক্ষাত মুখ্য ভূমিকা পালন কৰিব। শাসনাধিষ্ঠ বিজেপিৰ বিৰুদ্ধে এক শক্তিশালী প্ৰত্যাহ্বান থিয় কৰোৱাই ক্ষমতা দখলৰ দিশত এই পদক্ষেপ কংগ্ৰেছৰ বাবে অত্যন্ত গুৰুত্বপূৰ্ণ বুলি বিবেচিত হৈছে।
