অসম চৰকাৰ-এপ’ল’ ডায়েলাইচিছৰ সহযোগিতাত ডিব্ৰুগড় জিলাত বিনামূলীয়া বৃক্ক ৰোগৰ চিকিত্সা সেৱাৰ সম্প্ৰসাৰণ

অসম চৰকাৰে ৰাজহুৱা-ব্যক্তিগত অংশীদাৰিত্বৰ আৰ্হিত এপ’ল’ ডায়েলাইচিছ ক্লিনিকৰ সহযোগত প্ৰধানমন্ত্ৰী ৰাষ্ট্ৰীয় ডায়েলাইচিছ কাৰ্যসূচীৰ জৰিয়তে ডিব্ৰুগড় জিলাত বিনামূলীয়া ডায়েলাইচিছ সেৱাৰ প্ৰসাৰ ঘটাইছে। ইয়াৰ দ্বাৰা দীৰ্ঘদিনীয়া বৃক্কৰ ৰোগত আক্ৰান্ত হাজাৰ হাজাৰ ৰোগী উপকৃত হৈছে। এই পদক্ষেপে ডিব্ৰুগড়ৰ অসম চিকিৎসা মহাবিদ্যালয় হাস্পতাল, মৰাণ সমূহীয়া স্বাস্থ্য কেন্দ্ৰ আৰু নাহৰকটীয়া মহকুমা অসামৰিক চিকিৎসালয়ত ডায়েলাইচিছ কেন্দ্ৰ পৰিচালনা কৰি আহিছে। এই সেৱাৰ ফলত যোগ্য ৰোগীসকলে কোনো ধৰণৰ নিজা খৰচ নকৰাকৈ ঘৰৰ ওচৰতে উন্নত বৃক্কৰ চিকিত্সা লাভ কৰিবলৈ সক্ষম হৈছে।
২০২৬ চনৰ জুন মাহৰ চৰকাৰী তথ্য অনুসৰি এই তিনিটা কেন্দ্ৰই জিলাখনৰ ৬,২৮৮গৰাকী বৃক্কৰ ৰোগীক সেৱা আগবঢ়াইছে আৰু ৪৪,৬৭০টা বিনামূলীয়া ডায়েলাইচিছ ছেচন সম্পন্ন কৰিছে। এপ’ল’ ডায়েলাইচিছ ক্লিনিকৰ মুখ্য পৰিচালন বিষয়া এম সুধাকৰ ৰাৱে কয় যে এই কেন্দ্ৰসমূহ আধুনিক আন্তঃগাঁথনি, অভিজ্ঞ বৃক্কৰোগ বিশেষজ্ঞ আৰু প্ৰশিক্ষিত ডায়েলাইচিছ টেকনিচিয়ানৰ দ্বাৰা সমৰ্থিত। অসম চৰকাৰৰ সৈতে থকা এই অংশীদাৰিত্বৰ জৰিয়তে গ্ৰাম্য আৰু দূৰৱৰ্তী অঞ্চলসমূহত উন্নত মানদণ্ডৰ বৃক্কৰ যত্নৰ সুবিধা বৃদ্ধি কৰাৰ ওপৰত বিশেষ গুৰুত্ব আৰোপ কৰা হৈছে।
ডিব্ৰুগড়ৰ এই সুবিধাসমূহ ৰাজ্যজুৰি থকা এক বৃহৎ নেটৱৰ্কৰ অংশ, যাৰ অধীনত এপ’ল’ই বৰ্তমান অসমত ৭২টা ডায়েলাইচিছ কেন্দ্ৰ পৰিচালনা কৰি আছে আৰু আন ৯টা ক্লিনিক মুকলিৰ বাবে সাজু কৰি তোলা হৈছে। এই নেটৱৰ্কে সামূহিকভাৱে সমগ্ৰ ৰাজ্যখনত ২০,০০০তকৈও অধিক ৰোগীক সেৱা আগবঢ়াইছে আৰু ১২ লাখতকৈও অধিক বিনামূলীয়া ডায়েলাইচিছ ছেচন প্ৰদান কৰিছে।
ডিব্ৰুগড় চহৰত এই উন্নত ডায়েলাইচিছ সেৱাৰ সম্প্ৰসাৰণে চহৰখনক উজনি অসমৰ এক অগ্ৰণী স্বাস্থ্যসেৱা কেন্দ্ৰ হিচাপে স্থিতি শক্তিশালী কৰিব বুলি আশা কৰা হৈছে। বিশেষ বৃক্ক ৰোগৰ চিকিৎসাৰ উন্নত সুবিধাই চুবুৰীয়া জিলাসমূহৰ ৰোগীসকলৰ চিকিৎসাৰ বাবে কৰিবলগীয়া ভ্ৰমণ খৰচ হ্ৰাস কৰিব, স্বাস্থ্যসেৱা সমৰ্থনকাৰী সেৱাসমূহৰ চাহিদা সৃষ্টি কৰিব আৰু অঞ্চলটোৰ চিকিৎসা আন্তঃগাঁথনি তথা স্বাস্থ্য অৰ্থনীতিত ডিব্ৰুগড়ৰ বৰ্ধিত গুৰুত্বক পুনৰ প্ৰতিপন্ন কৰিব।