যানবাহনৰ গোপন চেম্বাৰ ব্যৱহাৰ কৰি নিচাযুক্ত দ্ৰব্য সৰবৰাহৰ নতুন কৌশল পোহৰলৈ আহিল কাছাৰত। ধলাই আৰক্ষী থানাৰ সন্মুখত চলোৱা তালাচী অভিযানত এখন অটোৰ বিশেষভাৱে নিৰ্মাণ কৰা গোপন চেম্বাৰৰ পৰা সন্দেহযুক্ত হেৰ’ইন জব্দ কৰাৰ লগতে চালকজনক আটক কৰিছে আৰক্ষীয়ে।
আৰক্ষীয়ে সদৰী কৰা মতে, সোমবাৰে আবেলি প্ৰায় ৫.৩০ বজাত নিয়মীয়া বাহন তালাচীৰ সময়ত ভাগা বজাৰৰ পৰা শিলচৰ অভিমুখে আহি থকা এখন অটো সন্দেহৰ ভিত্তিত ৰখোৱা হয়। নিৰ্দিষ্ট গোপন তথ্যৰ ভিত্তিত বাহনখনত অধিক বিস্তৃতভাৱে তালাচী চলায় আৰক্ষীয়ে।
অটোখন চলাই আছিল শ্যামাচৰণপুৰ গাঁও পঞ্চায়তৰ বাসিন্দা ২৭ বছৰীয়া ছেবুল হুছেইন বৰভূঞাই। প্ৰাৰম্ভিক তালাচীত কোনো নিচাযুক্ত দ্ৰব্য উদ্ধাৰ হোৱা নাছিল যদিও গোপন তথ্যৰ ভিত্তিত পুনৰ পৰীক্ষা চলোৱাৰ সময়ত চালকৰ আসনৰ তলত বিশেষভাৱে নিৰ্মাণ কৰা এটা গোপন চেম্বাৰ উদ্ধাৰ হয়।
সেই চেম্বাৰৰ ভিতৰৰ পৰা সন্দেহযুক্ত হেৰ’ইন ভৰ্তি চাৰিটা চাবোনৰ বাকচ জব্দ কৰা হয়। আৰক্ষীৰ তথ্য অনুসৰি, জব্দ কৰা এই নিচাযুক্ত দ্ৰব্যৰ ক’লা বজাৰৰ মূল্য কেইবা লাখ টকা হ’ব পাৰে।
ঘটনাৰ পিছতে চালকজনক আটক কৰি ধলাই আৰক্ষী থানালৈ নিয়া হয়। হেৰ’ইনখিনি ক’ৰ পৰা অনা হৈছিল, ক’লৈ নিয়া হৈছিল আৰু এই সৰবৰাহ কোনো বৃহৎ নিচাযুক্ত দ্ৰব্য সৰবৰাহ চক্ৰৰ সৈতে জড়িত নেকি, সেই দিশত তদন্ত অব্যাহত ৰাখিছে আৰক্ষীয়ে।
