মাৰ্ঘেৰিটাৰ কংগ্ৰেছ প্ৰাৰ্থিত্ব ত্যাগ প্ৰতীক বৰদলৈৰ; পিতৃ প্ৰদ্যুৎ বৰদলৈৰ বিজেপি যাত্ৰাৰ পাছতে এই সিদ্ধান্ত

নিৰ্বাচনী যুঁজৰ মাজপথতে এতিয়া প্ৰাৰ্থিত্ব প্ৰত্যাহাৰ কৰিলে মাৰ্ঘেৰিটাৰ কংগ্ৰেছ প্ৰাৰ্থী প্ৰতীক বৰদলৈয়ে। পিতৃ তথা নগাঁও লোকসভা সমষ্টিৰ সাংসদ প্ৰদ্যুৎ বৰদলৈয়ে বুধবাৰে বিজেপিত যোগদান কৰাৰ পাছতে যুৱ নেতাগৰাকীয়ে এই সিদ্ধান্ত গ্ৰহণ কৰে। এই সন্দৰ্ভত তেওঁ ইতিমধ্যে নিখিল ভাৰত কংগ্ৰেছ কমিটিৰ সভাপতি মল্লিকাৰ্জুন খাৰ্গেলৈ এখন পত্ৰ প্ৰেৰণ কৰিছে। পত্ৰখনত তেওঁ মাৰ্ঘেৰিটা সমষ্টিৰ পৰা কংগ্ৰেছৰ প্ৰাৰ্থিত্ব প্ৰত্যাহাৰ কৰাৰ কথা আনুষ্ঠানিকভাৱে জানিবলৈ দিয়ে। পিতৃৰ আকস্মিক দলত্যাগৰ পাছতে প্ৰতীক বৰদলৈয়ে এই পদক্ষেপ গ্ৰহণ কৰা বিষয়টোৱে এতিয়া বিশেষ চৰ্চা লাভ কৰিছে। নিৰ্বাচনলৈ মাত্ৰ কেইটামান দিন বাকী থকা অৱস্থাত প্ৰাৰ্থীগৰাকীৰ এই সিদ্ধান্তই মাৰ্ঘেৰিটা সমষ্টিত কংগ্ৰেছক এক বৃহৎ প্ৰত্যাহ্বানৰ সন্মুখত পেলাইছে।