বিশ্বৰ দুই পাৰমাণৱিক শক্তিধৰ দেশ ভাৰত আৰু পাকিস্তানৰ মাজত সম্ভাৱ্য এক বিধ্বংসী যুদ্ধ ৰখাই ১০ মিলিয়ন লোকৰ প্ৰাণ ৰক্ষা কৰা বুলি পুনৰ বিস্ফোৰক দাবী কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। শুকুৰবাৰে ফ্ল’ৰিডাত এক অনুষ্ঠানত ভাষণ দি ট্ৰাম্পে কয় যে যোৱা এটা বছৰৰ ভিতৰত তেওঁ আঠখনকৈ শান্তি চুক্তিত স্বাক্ষৰ কৰিছে আৰু গাজা যুদ্ধৰো অৱসান ঘটাইছে। তেওঁৰ দাবী অনুসৰি, পাকিস্তানৰ প্ৰধানমন্ত্ৰী শ্বাহবাজ শ্বৰীফে নিজেই ট্ৰাম্পক ভাৰত-পাক সংঘাত বন্ধ কৰি কোটি কোটি লোকৰ জীৱন ৰক্ষা কৰাৰ বাবে কৃতিত্ব দিছে। ট্ৰাম্পে ইয়াক এক বৃহৎ “সন্মান” বুলি অভিহিত কৰি শান্তিৰ নোবেল বঁটাৰ বাবেও নিজৰ দাবী পুনৰবাৰ উত্থাপন কৰে।
উল্লেখ্য যে যোৱা বৰ্ষৰ ১০ মে’ত হোৱা ভাৰত-পাক যুদ্ধবিৰতিৰ পাছৰে পৰা ট্ৰাম্পে প্ৰায় ৮০ বাৰ এই দাবী কৰিছে যে আমেৰিকাৰ হস্তক্ষেপৰ বাবেহে যুদ্ধ স্তব্ধ হৈছে। অৱশ্যে ভাৰতে আৰম্ভণিৰে পৰাই ট্ৰাম্পৰ এই দাবীক সম্পূৰ্ণৰূপে নাকচ কৰি আহিছে। ভাৰত চৰকাৰৰ মতে, পাকিস্তানৰ অনুৰোধত দুয়ো দেশৰ সামৰিক চেনেলেহে এই যুদ্ধবিৰতিৰ সিদ্ধান্ত লৈছিল আৰু ইয়াত কোনো তৃতীয় পক্ষৰ ভূমিকা নাছিল। ২০২৫ চনৰ এপ্ৰিলত পেহেলগাম সন্ত্ৰাসবাদী আক্ৰমণৰ প্ৰত্যুত্তৰত ভাৰতে পাকিস্তানৰ বিৰুদ্ধে ‘অপাৰেচন সিন্দুৰ’ আৰম্ভ কৰাৰ পাছতে দুয়ো দেশৰ মাজত উত্তেজনা চৰম পৰ্যায় পাইছিল।
ট্ৰাম্পে নিজৰ ভাষণত কয় যে পূৰ্বে কোনোৱেই মধ্যপ্ৰাচ্যত শান্তি স্থাপনৰ কথা ভাবিব পৰা নাছিল, কিন্তু তেওঁ সেয়া সম্ভৱ কৰি তুলিলে। পাকিস্তানৰ প্ৰধানমন্ত্ৰীয়ে হোৱাইট হাউচ ভ্ৰমণৰ সময়তো ট্ৰাম্পক ধন্যবাদ দিয়া বুলি আমেৰিকাৰ ৰাষ্ট্ৰপতিগৰাকীয়ে দোহাৰে। ইফালে, ভাৰতে নিজৰ স্থিতি স্পষ্ট কৰি জনাইছে যে পাকিস্তানৰ সৈতে থকা যিকোনো বিবাদ দ্বিপাক্ষিকভাৱে সমাধান কৰা হ’ব আৰু ইয়াত আমেৰিকা বা আন কোনো দেশৰ মধ্যস্থতা গ্ৰহণযোগ্য নহয়।
