নাবালিকা খেলুৱৈক যৌন নিৰ্যাতনৰ গুৰুতৰ অভিযোগ! ৰাষ্ট্ৰীয় শ্বুটিং প্ৰশিক্ষক অংকুশ ভৰদ্বাজক নিলম্বন

ভাৰতীয় ক্ৰীড়া জগতত এক লজ্জাজনক ঘটনাই এতিয়া তীব্ৰ চাঞ্চল্যৰ সৃষ্টি কৰিছে। এগৰাকী নাবালিকা শ্বুটাৰক যৌন নিৰ্যাতন চলোৱাৰ গুৰুতৰ অভিযোগ উত্থাপন হোৱাৰ পিছতে ৰাষ্ট্ৰীয় ৰাইফল এছ’চিয়েশ্যন অৱ ইণ্ডিয়াই (NRAI) প্ৰশিক্ষক অংকুশ ভৰদ্বাজক তাৎক্ষণিকভাৱে নিলম্বন কৰে। ফৰিদাবাদত এই সন্দৰ্ভত ইতিমধ্যে এক এজাহাৰ দাখিল কৰা হৈছে। এন আৰ এ আইৰ সচিব ৰাজীৱ ভাটিয়াই সংবাদ মাধ্যমৰ আগত জানিবলৈ দিয়ে যে নৈতিকতাৰ ভিত্তিত প্ৰশিক্ষকগৰাকীক নিলম্বন কৰা হৈছে। তদন্ত প্ৰক্ৰিয়া সম্পূৰ্ণ নোহোৱালৈকে তেওঁ কোনো ধৰণৰ প্ৰশিক্ষণ কাৰ্যসূচীৰ সৈতে জড়িত হ’ব নোৱাৰিব। বৰ্তমান তেওঁক দোষমুক্ত প্ৰমাণ কৰাৰ দায়িত্ব তেওঁৰ ওপৰত ন্যস্ত কৰা হৈছে। ভুক্তভোগী নাবালিকা খেলুৱৈগৰাকীৰ ভাষ্য অনুসৰি, যোৱা মাহত কৰ্ণী সিং ৰেঞ্জত প্ৰশিক্ষণ শেষ কৰি ওলাই অহাৰ সময়তে তেওঁ এই নিৰ্যাতনৰ বলি হয়। যোৱা বছৰৰ আগষ্ট মাহৰ পৰাই তেওঁ ভৰদ্বাজৰ ওচৰত প্ৰশিক্ষণ গ্ৰহণ কৰি আছিল। দীৰ্ঘদিন ধৰি মানসিক আঘাতত ভুগি থকা কিশোৰীগৰাকীয়ে ১ জানুৱাৰীত মাতৃৰ আগত সকলো কথা বিৱৰি কয়। এন আৰ এ আইৰ পৰামৰ্শ অনুসৰি ২০২৪ চনৰ পেৰিছ অলিম্পিকৰ পাছত ভাৰতীয় ক্ৰীড়া প্ৰাধিকৰণে ভৰদ্বাজক ৩৭ জনীয়া প্ৰশিক্ষক দলটোৰ এজন হিচাপে নিযুক্তি দিছিল। হাৰিয়ানাৰ সুৰজকুণ্ডত সংঘটিত হোৱা এই নিৰ্যাতনৰ ঘটনাই সমগ্ৰ শ্বুটিং শিবিৰতে জোকাৰণি তুলিছে। অভিযুক্ত অংকুশ ভৰদ্বাজ এজন প্ৰাক্তন পিষ্টল শ্বুটাৰ। ইয়াৰ পূৰ্বেও ২০১০ চনত প্ৰতিযোগিতাৰ সময়ত নিষিদ্ধ ড্ৰাগছ সেৱন কৰাৰ বাবে তেওঁ ডোপিং সম্পৰ্কীয় নিষেধাজ্ঞাৰ সন্মুখীন হৈছিল। বৰ্তমান আৰক্ষীৰ তদন্তৰ জৰিয়তেহে এই সমগ্ৰ ঘটনাৰ সত্যতা পোহৰলৈ আহিব।