ৱাকফ সংশোধনী বিধেয়ক লোকসভাত গৃহীত হৈছে। বিধেয়কখনৰ সপক্ষে ২৮৮ টা আৰু বিপক্ষে ২৩২ টা ভোট দিয়া হৈছে। সংশোধনী বিধেয়কখন বুধবাৰে সংখ্যালঘু উন্নয়ন দপ্তৰৰ মন্ত্ৰী কিৰেন ৰিজিজুৰ দ্বাৰা উত্থাপন কৰা হৈছিল। লোকসভাৰ পৰা সেউজ সংকেত পোৱাৰ পিছত, বিধেয়কখন এতিয়া বৃহস্পতিবাৰে ৰাজ্যসভাত উত্থাপন কৰা হয়। লোকসভাত বিধেয়কখন উত্থাপনৰ পিছত বুধবাৰে শাসকীয় দল আৰু বিৰোধীৰ মাজত তীব্ৰ বিতৰ্ক হৈছিল।
কংগ্ৰেছ, বিএছপি, তৃণমূল কংগ্ৰেছ আৰু ইণ্ডিয়া মহাজোটৰ অন্যান্য দলে বিধেয়কখনৰ বিৰুদ্ধে স্থিতি গ্ৰহণ কৰিছিল। আনহাতে, বিজেপিৰ মিত্ৰদল জেডি(ইউ) আৰু টিডিপিয়ে বিধেয়কখনক সমৰ্থন আগবঢ়াইছিল। চৰকাৰে ১৯৯৫ চনত তৈয়াৰ কৰা ৱাকফ বিধেয়কত সংশোধন কৰি বহুতো নতুন ব্যৱস্থা যোগ অন্তৰ্ভুক্ত কৰিছে। সংশোধনীৰ পিছত, কেন্দ্ৰীয় ৱাকফ পৰিষদ আৰু ৱাকফ বোৰ্ডত দুজন অ-মুছলমান সদস্যক নিয়োগ কৰা হ’ব।
ইয়াৰ উপৰিও, সেইসকল ব্যক্তিয়ে ৱাকফক দান কৰিবলৈ সক্ষম হ’ব, যিসকলে কমেও পাঁচ বছৰ ধৰি ইছলাম অনুসৰণ কৰি আছে । ৱাকফৰ সৈতে থকা চৰকাৰী ভূমিৰ মালিকীস্বত্ব স্থানীয় কৰ্তৃপক্ষৰ দ্বাৰা নিৰ্ধাৰণ কৰা হ’ব। কিন্তু বিৰোধীয়ে কৈছে যে ৱাকফ বিধেয়কখন অসাংবিধানিক। আনহাতে চৰকাৰে স্পষ্ট কৰিছে যে সংশোধনীৰ ধৰ্মৰ সৈতে কোনো সম্পৰ্ক নাই আৰু কেৱল এইখন সম্পত্তি নিয়ন্ত্ৰণ কৰা আইন।
