বিহুৰ পিছত এইবাৰ বিশ্ব ৰেকৰ্ড গঢ়িবলৈ প্ৰস্তুতি চলাইছে মহাপুৰুষ গুৰু জনাৰ সৃষ্টি দিহানামক।
লক্ষ্য বিশ্বৰেকৰ্ড। চলিত বৰ্ষৰ ২৫ নবেম্বৰত অসম বাসীয়ে আকৌ গঢ়িব বিশ্বৰেকৰ্ড। এইবাৰ মহাপুৰুষ শ্ৰীমন্ত শংকৰদেৱ গুৰুজনাৰ দিহানামক বিশ্বদৰবাৰত পৰিচয় কৰিবলৈ প্ৰস্তুতি চলাইছে অসমবাসীয়ে। এইবাৰ ৬০ হাজাৰ নামতীৰ দ্বাৰা পৰিবেশিত মহাপুৰুষ গুৰুজনাৰ দিহানাম অন্তৰ্ভুক্ত হব বিশ্বদৰবাৰত। ডিব্ৰুগড় জিলাৰ বিভিন্ন প্ৰান্তৰ পৰা ৫ শতাধিক নামতী সকল একেলগ হৈ ডিব্ৰুগড়ৰ কোটোহাত নামতী সকলে চলাইছে প্ৰস্তুতি।
সদৌ অসম শংকৰ মাধৱ সাংস্কৃতিক দিহানাম সমিতিৰ নেতৃত্বত অসমৰ প্ৰতিখন জিলাই জিলাই চলিছে প্ৰস্তুতি। ৫ হাজাৰ দিহানামৰ দলে অংশগ্ৰহণ কৰিব আৰু প্ৰতিটো দলত থাকিব ১২ জনকৈ শিল্পী। ৬০ হাজাৰ শিল্পীৰ দ্বাৰা পৰিবেশিত দিহানামক অন্তৰ্ভূক্ত কৰিব বিশ্বদৰবাৰত। ইতিমধ্যে দিহানামৰ নামতী সকলৰ পঞ্জীয়নৰ কাম চলি আছে বুলি জানিবলৈ দিয়ে সদৌ অসম শংকৰ মাধৱ সাংস্কৃতিক দিহানাম সমিতিৰ বিষয়ববীয়া সকলে। চলি আছে চৰকাৰৰ লগত আলোচনা। মুখ্যমন্ত্ৰীৰ অনুমতি পালেই অসমৰ প্ৰতিখন জিলাই জিলাই চলিব দিহানামৰ আখৰা।
