এক দশকৰো কম সময়ৰ ভিতৰত, অধ্যয়নৰ বাবে ভাৰতলৈ অহা বিদেশী শিক্ষাৰ্থীৰ সংখ্যা প্ৰায় ৪২ শতাংশ বৃদ্ধি পাইছে। ভাৰত চৰকাৰৰ তথ্যত উল্লেখ আছে যে যোৱা কেইবছৰমানত যিসমূহ দেশে তেওঁলোকৰ শিক্ষাৰ্থীসকলক অধ্যয়নৰ বাবে ভাৰতলৈ প্ৰেৰণ কৰি আহিছে, সেই দেশসমূহত কোনো পৰিৱৰ্তন হোৱা নাই। যদিও ভাৰতলৈ অহা বিদেশী শিক্ষাৰ্থীৰ এটা ডাঙৰ অংশ দক্ষিণ এছিয়াৰ দেশবোৰৰ পৰা আহে, নেপাল শীৰ্ষ নম্বৰত আছে। ইয়াৰ আগতে, মালয়েছিয়া আৰু ভূটানৰ দৰে দেশবোৰে তেওঁলোকৰ বৃহৎ সংখ্যক শিক্ষাৰ্থী ভাৰতলৈ প্ৰেৰণ কৰিছিল। কিন্তু এই দেশবোৰৰ শিক্ষা ব্যৱস্থাৰ উন্নতিৰ পিছত, তেওঁলোকৰ সংখ্যা হ্ৰাস পাইছে। সাত বছৰধৰি সৰ্বভাৰতীয় উচ্চশিক্ষা জৰীপ (এআইএছএইচই)ৰ তথ্য অনুসৰি, ভাৰতলৈ অহা বিদেশী শিক্ষাৰ্থীৰ সংখ্যা ২০১২-১৩ বৰ্ষত ৩৪,৭৭৪ ৰ পৰা ২০১৯-২০ বৰ্ষত ৪৯,৩৪৮ লৈ বৃদ্ধি পাইছে। সাত বছৰৰ তথ্য বিশ্লেষণ কৰাৰ পিছত দেখা গৈছে যে নেপালে সৰ্বাধিক সংখ্যক শিক্ষাৰ্থী ভাৰতলৈ প্ৰেৰণ কৰি আহিছে। ইয়াৰ পিছত আছে আফগানিস্তান। যোৱা দুই-তিনি বছৰ ধৰি বাংলাদেশৰ পৰা অহা শিক্ষাৰ্থীৰ সংখ্যাও বৃদ্ধি পাইছে। কিন্তু ভূটান আৰু মালয়েছিয়াৰ পৰা অহা শিক্ষাৰ্থীৰ সংখ্যা হ্ৰাস পাইছে। শেহতীয়া বছৰবোৰত, ইৰাক আৰু ইৰাণৰ পৰা অহা শিক্ষাৰ্থীৰ প্ৰৱণতাও হ্ৰাস হোৱা দেখা গৈছে। তথ্যই দেখুৱাইছে যে ভাৰতলৈ অহা বেছিভাগ বিদেশী শিক্ষাৰ্থীয়ে স্নাতক কাৰ্যসূচীৰ বাবে নাম ভৰ্তি কৰে। স্নাতকোত্তৰ আৰু তাৰ পিছত পিএইচডি শিক্ষাৰ্থীৰ সংখ্যা ইয়াতকৈ কম। আনহাতে প্ৰমাণপত্ৰ পাঠ্যক্ৰমৰ বাবে মাত্ৰ কেইজনমান শিক্ষাৰ্থী ভাৰতলৈ আহে। বিজ্ঞানৰ বিষয়বোৰক সৰ্বাধিক অগ্ৰাধিকাৰ দিয়া হয়। ২০১৯-২০ বৰ্ষত, ভাৰতৰ মুঠ বিদেশী শিক্ষাৰ্থীৰ ভিতৰত, ৯,৫০৩ জনে প্ৰযুক্তিবিদ্যাৰ স্নাতক কাৰ্যসূচীত নামভৰ্তি কৰিছিল, তাৰ পিছত বিজ্ঞানৰ স্নাতকত ৩,৯৬৭ জন আৰু ব্যৱসায় প্ৰশাসনৰ স্নাতকত ৩,২৯০ জন। যোৱা কেইবছৰমানত এই প্ৰৱণতা সমানে দেখা গৈছে। ২০২০ আৰু ২০২১ত মহামাৰীৰ সময়ৰ বাবে কোনো তথ্য উপলব্ধ নহয় । ২০১৯ লৈকে তথ্যই ভাৰতত শিক্ষাৰ সুযোগৰ এক স্পষ্ট ছবি অংকন কৰিছে।
