দেশৰ বিভিন্ন নিৰ্বাচনত লাভ কৰা ধাৰাবাহিক সাফল্যৰ পাছত শাসকীয় জোঁটৰ সাংসদসকলক অধিক সক্ৰিয় আৰু দায়বদ্ধ হ’বলৈ এতিয়া বিশেষ আহ্বান জনাইছে প্ৰধানমন্ত্ৰী নৰেন্দ্ৰ মোদীয়ে। মঙলবাৰে নতুন দিল্লীত অনুষ্ঠিত ৰাষ্ট্ৰীয় গণতান্ত্ৰিক মিত্ৰজোঁট চমুকৈ এনডিএৰ সংসদীয় দলৰ গুৰুত্বপূৰ্ণ বৈঠকত অংশগ্ৰহণ কৰি প্ৰধানমন্ত্ৰীগৰাকীয়ে স্পষ্ট কৰি দিয়ে যে কেৱল নিৰ্বাচনী জয়েই শেষ কথা নহয়। তেওঁ সাংসদসকলক উদ্দেশ্যি কয় যে কোনো কাৰণতে নিৰ্বাচনী ফলাফলক লৈ আত্মসন্তুষ্ট হ’ব নালাগে, বৰঞ্চ জনহিতকৰ নীতি আৰু কঠোৰ পৰিশ্ৰমেৰে জনসাধাৰণৰ কাষ চাপিব লাগে।
বৈঠকৰ সন্দৰ্ভত সংসদীয় পৰিক্ৰমা মন্ত্ৰী কিৰেণ ৰিজিজুৱে সংবাদ মাধ্যমক জনোৱা মতে, প্ৰধানমন্ত্ৰীয়ে সাংসদসকলক তৃণমূল পৰ্যায়ত কাম কৰি যাবলৈ নিৰ্দেশ দিছে। প্ৰধানমন্ত্ৰীয়ে কয়, “মাটিত থকা অবিহনে নিৰ্বাচন জিকিব নোৱাৰি।” তেওঁ লগতে কয়, “আমি মাটিত থাকিব লাগিব আৰু জনসাধাৰণৰ কল্যাণৰ বাবে ভাল কাম কৰিব লাগিব।” এই বৈঠকত ৩৯খন উন্নত দেশৰ সৈতে শেহতীয়া বাণিজ্য চুক্তি সফল কৰাৰ বাবে এনডিএৰ নেতাসকলে প্ৰধানমন্ত্ৰীক সম্বৰ্ধনা জ্ঞাপন কৰে।
শিৱসেনাৰ সাংসদ মিলিন্দ দেওৰাই প্ৰধানমন্ত্ৰীৰ নেতৃত্বক প্ৰশংসা কৰি কয়, “প্ৰধানমন্ত্ৰী মোদীয়ে সকলো সাংসদক বুজাই দিছে যে চৰকাৰে ভাৰতৰ স্বাৰ্থত কাম কৰে, সেয়া বাণিজ্য চুক্তিয়ে হওক বা বাজেট।” তেওঁ লগতে কয়, “ভাৰত আৰু আমেৰিকা তথা ভাৰত আৰু ইউৰোপৰ মাজত হোৱা বাণিজ্য চুক্তিৰ কৃতিত্ব প্ৰধানমন্ত্ৰী মোদীৰ।” ইফালে, সংসদীয় দলৰ এই বৈঠকত বিজেপিৰ নৱ-নিৰ্বাচিত সভাপতি নিতিন নবীনক আনুষ্ঠানিকভাৱে আদৰণি জনোৱা হয়।
