নিকোবৰ জিলা আৰক্ষীয়ে ভাৰতীয় উপকূলৰক্ষী বাহিনী আৰু সেনাৰ সৈতে এক যুটীয়া অভিযান চলাই সাগৰীয় সীমা সুৰক্ষিত কৰাৰ লগতে এক বৃহৎ চোৰাং চিকাৰীৰ চক্ৰ উৎখাত কৰিবলৈ সক্ষম হয়। যোৱা ৪ এপ্ৰিলত পুৱা ৯:১৫ বজাত নানকৌৰী আৰক্ষী থানাৰ এটা দলে কাকানা, পিলপিল’, পন্ধা আৰু ডেৰিং উপকূলত চোৰাং চিকাৰ বিৰোধী অভিযান আৰম্ভ কৰিছিল। এই অভিযানৰ নেতৃত্বত থকা উপ-পৰিদৰ্শক এম এম দাসন আৰু তেওঁৰ দলটোৱে উত্তৰ কাকানাৰ উপকূলত এখন সন্দেহজনক ম্যানমাৰৰ চোৰাং চিকাৰী জাহাজ প্ৰত্যক্ষ কৰে।
আৰক্ষীৰ উপস্থিতিৰ উমান পাই চোৰাং চিকাৰীৰ জাহাজখনে লংগৰ কাটি পলায়নৰ চেষ্টা চলায়। আৰক্ষীৰ দলটোৱে ততালিকে জাহাজখনৰ পিছে পিছে ধাৱমান হয় আৰু উপকূলৰক্ষী বাহিনীৰ সৈতে সমন্বয় ৰাখি বাধা দিয়াৰ চেষ্টা কৰে। আৰক্ষীৰ কনিষ্টবল কেনি ৰজাৰে দুজাই সতৰ্কতামূলক গুলীবৰ্ষণ কৰিছিল যদিও চোৰাং চিকাৰীসকলে সেয়া আওকাণ কৰি পলায়ন অব্যাহত ৰাখে। পৰৱৰ্তী সময়ত জাহাজখন আইল অৱ মেন দ্বীপৰ ওচৰত পৰিত্যক্ত অৱস্থাত উদ্ধাৰ কৰা হয় আৰু চিকাৰীসকল ঘন অৰণ্যত আত্মগোপন কৰে।
এই দুষ্কৃতিকাৰীসকলক কৰায়ত্ত কৰিবলৈ আৰক্ষীয়ে ‘চি চেন্টিনেল’ নামৰ এক বৃহৎ অভিযান আৰম্ভ কৰে। ৫ এপ্ৰিলৰ পুৱা প্ৰায় ৭:১৫ বজাত আৰক্ষী আৰু সেনাৰ এটা যুটীয়া দলে অৰণ্যত তীব্ৰ তালাচী চলাই এজন ম্যানমাৰৰ নাগৰিকক কৰায়ত্ত কৰে। অভিযান অব্যাহত ৰাখি ৬ এপ্ৰিলত অৰণ্যৰ ভিতৰত লুকাই থকা বাকী ১০ গৰাকী বিদেশী নাগৰিককো আৰক্ষীয়ে আটক কৰিবলৈ সক্ষম হয়। সমগ্ৰ অভিযান কালত মুঠ ১১ গৰাকী চোৰাং চিকাৰীক আটক কৰাৰ লগতে চোৰাং চিকাৰত ব্যৱহৃত জাহাজখন আৰু প্ৰায় ৮০০ কিলোগ্ৰাম অবৈধভাৱে সংগ্ৰহ কৰা সাগৰীয় তিয়ঁহ জব্দ কৰা হয়।
নিকোবৰ জিলাৰ আৰক্ষী অধীক্ষক ৰাহুল এল নায়াৰৰ নিৰ্দেশনা আৰু এছ ডিপি অ’ চামুৱেল চলোমনৰ তত্বাৱধানত এই সমগ্ৰ সফল অভিযানটো পৰিচালনা কৰা হয়। দেশৰ সাগৰীয় সীমা আৰু সামুদ্ৰিক পৰিস্থিতিতন্ত্ৰ সুৰক্ষিত কৰাৰ ক্ষেত্ৰত আৰক্ষী, সেনা আৰু উপকূলৰক্ষী বাহিনীৰ এই ঐক্যবদ্ধ প্ৰচেষ্টাক এক বৃহৎ সফলতা হিচাপে গণ্য কৰা হৈছে। আৰক্ষীয়ে কোনো ধৰণৰ অপৰাধমূলক বা অবৈধ কাৰ্যকলাপৰ তথ্য পালে ১১২ বা সংশ্লিষ্ট ফোন নম্বৰত যোগাযোগ কৰি তথ্য যোগান ধৰিবলৈ ৰাইজক আহ্বান জনাইছে আৰু তথ্যদাতাৰ পৰিচয় গোপন ৰখা হ’ব বুলিও নিশ্চিত কৰিছে।
