২০২৫-২৬ শিক্ষাবৰ্ষৰ ছায়েন্স অলিম্পিয়াড ফাউণ্ডেচন (এছঅ’এফ) পৰীক্ষাত গুৱাহাটীৰ শিক্ষাৰ্থীয়ে চমকপ্ৰদ প্ৰদৰ্শন আগবঢ়াই আন্তঃৰাষ্ট্ৰীয় পৰ্যায়ত চহৰখনলৈ গৌৰৱ কঢ়িয়াই আনিছে। চলিত বৰ্ষৰ এছঅ’এফ অলিম্পিয়াডত ৭২খন দেশৰ লাখ লাখ শিক্ষাৰ্থীয়ে অংশগ্ৰহণ কৰিছিল, য’ত গুৱাহাটীৰ ৪২,০০০তকৈও অধিক শিক্ষাৰ্থীয়ে অংশ লৈছিল।
শীৰ্ষ স্থান লাভ কৰা শিক্ষাৰ্থীসকলৰ ভিতৰত, চেইণ্ট ৰ’জ স্কুলৰ প্ৰথম শ্ৰেণীৰ নিশান্ত ছেত্ৰীয়ে আন্তঃৰাষ্ট্ৰীয় সাধাৰণ জ্ঞান অলিম্পিয়াড (আইজিকেঅ’) ত আন্তঃৰাষ্ট্ৰীয় প্ৰথম স্থান (ৰেংক ১) অৰ্জন কৰে। মডাৰ্ন ইংলিছ স্কুলৰ চতুৰ্থ শ্ৰেণীৰ অৰ্ণৱ ভাগৱতীয়ে ৰাষ্ট্ৰীয় বিজ্ঞান অলিম্পিয়াড (এনএছঅ’)ত আন্তঃৰাষ্ট্ৰীয় প্ৰথম স্থান লাভ কৰে, আনহাতে হেপ্পী মণ্টেশ্বৰী হাইস্কুলৰ চতুৰ্থ শ্ৰেণীৰ ৰোহিত মাহতোৱে আন্তঃৰাষ্ট্ৰীয় হিন্দী অলিম্পিয়াড (আইএইছঅ’)ত আন্তঃৰাষ্ট্ৰীয় প্ৰথম স্থান দখল কৰে। এই তিনিওগৰাকী শিক্ষাৰ্থীয়ে স্বৰ্ণ পদক লাভ কৰিব।
আনহাতে, মহৰ্ষি বিদ্যা মন্দিৰ-IVৰ প্ৰথম শ্ৰেণীৰ ছাত্ৰী অহনা ভূঞাই ৰাষ্ট্ৰীয় বিজ্ঞান অলিম্পিয়াডত তৃতীয় স্থানত থাকি আন্তঃৰাষ্ট্ৰীয় ৰেংক ৩ অৰ্জন কৰিবলৈ সক্ষম হৈছে আৰু ছাত্ৰীগৰাকীক ব্ৰঞ্জৰ পদক প্ৰদান কৰা হ’ব। শিক্ষাৰ্থীগৰাকীয়ে অসাধাৰণ প্ৰদৰ্শনৰ প্ৰমাণপত্ৰ আৰু সুখ্যাতিৰ প্ৰমাণপত্ৰও লাভ কৰিব।
এছঅ’এফৰ প্ৰতিষ্ঠাপক তথা সঞ্চালক মহাবীৰ সিঙে শিক্ষাৰ্থী, অভিভাৱক আৰু বিদ্যালয়সমূহক অভিনন্দন জনাই কয় যে, অলিম্পিয়াডে যুৱ শিক্ষাৰ্থীসকলৰ মাজত সমালোচনাত্মক চিন্তা আৰু শৈক্ষিক উৎকৃষ্টতাক সদায়ে উৎসাহিত কৰি আহিছে। এই সাফল্যই গুৱাহাটী মহানগৰীৰ ক্ৰমবৰ্ধমান শৈক্ষিক পৰিৱেশ আৰু বিশ্ব পৰ্যায়ৰ প্ৰতিযোগিতাত শিক্ষাৰ্থীৰ বৰ্ধিত অংশগ্ৰহণক প্ৰতিফলিত কৰিছে।
