শেহতীয়া অসম বিধানসভা নিৰ্বাচনত এক ঐতিহাসিক বিজয় সাব্যস্ত কৰাৰ পিছতেই কাইলৈ ২৬ মে’ত গুৱাহাটীত আয়োজন কৰা হৈছে এক বিশাল সম্বৰ্ধনা অনুষ্ঠানৰ। ৰাজ্যত ধাৰাবাহিকভাৱে তৃতীয়বাৰৰ বাবে চৰকাৰ গঠনৰ পথ প্ৰশস্ত কৰা বিজেপি দলৰ সকলো নৱ-নিৰ্বাচিত ৮২ গৰাকী বিধায়কক অসম প্ৰদেশ বিজেপিৰ তৰফৰ পৰা এই অনুষ্ঠানত বিশেষভাৱে সন্মানিত কৰা হ’ব। কাইলৈ সন্ধিয়া ৬ বজাত শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত এই মূল কাৰ্যসূচী ৰূপায়ণ কৰা হ’ব বুলি দলৰ মুখ্য কাৰ্যালয়ৰ পৰা প্ৰকাশ কৰা এক বিবৃতিত জানিব পৰা গৈছে।
এই সম্বৰ্ধনা অনুষ্ঠানৰ পূৰ্বে কাইলৈ পুৱা ১০ বজাৰ পৰা শ্ৰী শ্ৰী দামোদৰদেৱ প্ৰেক্ষাগৃহত ৰাজ্যৰ সকলো জিলা আৰু মণ্ডল সভাপতিৰ উপস্থিতিত এক গুৰুত্বপূৰ্ণ সাংগঠনিক বৈঠক অনুষ্ঠিত হ’ব। বিধানসভা নিৰ্বাচনৰ এই বিপুল বিজয়ক তৃণমূল পৰ্যায়ৰ সক্ৰিয় কাৰ্যকৰ্তাসকলৰ কঠোৰ পৰিশ্ৰমৰ ফল বুলি উল্লেখ কৰি দলৰ মুখপাত্ৰ প্ৰাঞ্জল কলিতাই কয়, “ৰাজ্যৰ ৩১,৪৮৬ টা ভোটকেন্দ্ৰত দিন-ৰাতি একাকাৰ কৰি কাম কৰা প্ৰায় ৭২,০০০ সক্ৰিয় কাৰ্যকৰ্তা আৰু ৬৫ লাখ সদস্যৰ ত্যাগৰ বাবেই এই ঐতিহাসিক জয় সম্ভৱ হৈছে।”
২০২১ চনৰ তুলনাত এইবাৰ বিজেপিৰ ভোটৰ হাৰ প্ৰায় পাঁচ শতাংশ বৃদ্ধি পাই মুঠ ৩৮ শতাংশ স্পৰ্শ কৰা বুলিও তেওঁ স্পষ্ট কৰে। কেৱল নতুন বিধায়কসকলকেই নহয়, বৰঞ্চ দলৰ তৃণমূল ভেটি শক্তিশালী কৰা ৩৯ খন সাংগঠনিক জিলা আৰু ৪৩৩ টা মণ্ডলৰ সভাপতিসকলকো এই অনুষ্ঠানত তেওঁলোকৰ অনবদ্য অৱদানৰ বাবে সম্বৰ্ধনা জনোৱা হ’ব। এই ভব্য অনুষ্ঠানত মুখ্যমন্ত্রী ড° হিমন্ত বিশ্ব শৰ্মা, ৰাজ্যিক বিজেপিৰ সভাপতি দিলীপ শইকীয়া, কেন্দ্ৰীয় মন্ত্ৰী সৰ্বানন্দ সোণোৱাল, কেন্দ্ৰীয় ৰাজ্যিক মন্ত্ৰী পবিত্ৰ মাৰ্ঘেৰিটাৰ লগতে দলৰ জ্যেষ্ঠ নেতৃবৃন্দ, সাংসদ আৰু সহস্ৰাধিক দলীয় কাৰ্যকৰ্তা উপস্থিত থাকিব।
