বৈশ্বিক ৰাজনীতিৰ অস্থিৰতা আৰু পশ্চিম এছিয়াৰ যুদ্ধসদৃশ পৰিস্থিতিয়ে এতিয়া ভাৰতীয় কৃষি ৰপ্তানিৰ ক্ষেত্ৰখনতো সৃষ্টি কৰিছে এক নেতিবাচক প্ৰভাৱ। শনিবাৰে এই খণ্ডটোৰ সৈতে জড়িত অংশীদাৰসকলে প্ৰকাশ কৰা তথ্য অনুসৰি, মধ্যপ্ৰদেশৰ পৰা বিভিন্ন দেশলৈ ৰপ্তানি হোৱা বাচমতী আৰু সিদ্ধ অ-বাচমতী চাউলৰ বাণিজ্য এতিয়া গুৰুতৰভাৱে ব্যাহত হৈছে। বিশেষকৈ ৰাজ্যখনৰ ৰায়সেন আৰু বালাঘাট জিলাৰ চাউল ব্যৱসায়ীসকলে লোকচানৰ সন্মুখীন হবলগীয়া হৈছে।
পণ্যবাহী জাহাজৰ যাতায়তত ব্যাঘাত জন্মিব পৰা এই সংকটে পৰিবহণ ব্যয় অস্বাভাৱিকভাৱে বৃদ্ধি কৰিছে। ইয়াৰ পৰিপ্ৰেক্ষিতত মধ্যপ্ৰদেশৰ পৰা ইৰাণ, ইৰাক আৰু চৌদি আৰৱৰ দৰে দেশলৈ নিয়মীয়াকৈ ৰপ্তানি হোৱা চাউলৰ চালানসমূহ এতিয়া মাজভাগতে থমকি ৰৈছে। ৰপ্তানিৰ এই স্থবিৰতাই কেৱল আন্তঃৰাষ্ট্ৰীয় বাণিজ্যতে নহয়, বৰঞ্চ স্থানীয় বজাৰৰ মূল্যৰ ওপৰতো বিৰূপ প্ৰভাৱ পেলাইছে। যাতায়তৰ পথ সুৰক্ষিত নোহোৱাৰ বাবে বহু বাণিজ্যিক অৰ্ডাৰ ইতিমধ্যে বাতিল কৰিবলগীয়া হৈছে।
গোলকীয় পৰিস্থিতিৰ এনে অনিশ্চয়তাই মধ্যপ্ৰদেশৰ বাচমতী চাউলৰ বাবে থকা বিশাল বজাৰখনক সংকটলৈ ঠেলি দিছে। ৰপ্তানি বন্ধ হোৱাৰ ফলত গুদামসমূহত মজুত থকা চাউলৰ গুণগত মান হ্ৰাস পোৱাৰ সম্ভাৱনাই এতিয়া কৃষক আৰু মিলৰ মালিকসকলৰ মাজত তীব্ৰ উদ্বেগৰ সৃষ্টি কৰিছে। চৰকাৰী হস্তক্ষেপ বা বিকল্প পথৰ ব্যৱস্থা নহ’লে অনাগত দিনত এই কৃষিভিত্তিক ৰপ্তানি খণ্ডটো অধিক ভয়াৱহ পৰিস্থিতিৰ সন্মুখীন হোৱাটো প্ৰায় নিশ্চিত হৈ পৰিছে।
