ব্যতিক্ৰম মাছডোৰ উদ্যোগত ২০২৪ চনৰ ১০ জুনত ঢাকা ক্লাবত অনুষ্ঠিত হোৱা “ব্যতিক্ৰম শিক্ষা সন্মিলন”ৰ সফলতাৰে সামৰণি পৰিছে। গুৱাহাটীস্থিত বাংলাদেশৰ সহকাৰী উচ্চায়ুক্ত আৰু অন্যান্য আগশাৰীৰ সংগঠনৰ সহযোগাত আয়োজিত এই যুগান্তকাৰী অনুষ্ঠানটোৱে পূব ভাৰত আৰু বাংলাদেশৰ মাজত শৈক্ষিক আদান-প্ৰদানৰ ক্ষেত্ৰত এক মাইলৰ খুঁটি ৰূপে চিহ্নিত হৈছে। প্ৰথমবাৰৰ বাবে দুয়োটা অঞ্চলৰ বিশ্ববিদ্যালয় আৰু শিক্ষানুষ্ঠানসমূহে সহযোগিতাৰ সুযোগ আৰু সম্ভাৱনাৰ বিষয়ে আলোচনা কৰে, যাৰ ফলত দুয়োখন দেশৰ মাজত শৈক্ষিক আৰু সাংস্কৃতিক বান্ধোন অধিক শক্তিশালী হ’ব বুলি আশা কৰা হৈছে। এই অনুষ্ঠানত শৈক্ষিক ব্যৱধান দূৰ কৰি ভৱিষ্যতৰ নিয়োগ আৰু শিক্ষাৰ্থী বিনিময় কাৰ্যসূচীৰ প্ৰত্যাহ্বান আৰু সুযোগসমূহৰ ওপৰত গুৰুত্ব আৰোপ কৰি তিনিটা অন্তৰ্দৃষ্টিসম্পন্ন পেনেল আলোচনাও অনুষ্ঠিত হয়।
ব্যতিক্ৰম মাছডোৰ অধ্যক্ষ ড০ সৌমেন ভাৰতীয়ই এনে পদক্ষেপৰ প্ৰয়োজনীয়তাৰ ওপৰত আলোকপাত কৰি কয় যে, “ভাৰত-বাংলাদেশৰ মাজত যিমানে সামাজিক, সাংস্কৃতিক আৰু অৰ্থনৈতিক আদান-প্ৰদান বৃদ্ধি পাব, সিমানেই অৰ্থনৈতিক আৰু মানৱীয় সম্পৰ্ক অধিক শক্তিশালী হ’ব।” গুৱাহাটীত বাংলাদেশৰ সহকাৰী উচ্চায়ুক্ত ৰুহুল আমিনে এই ব্যতিক্ৰমী অনুষ্ঠানৰ মানদণ্ড আৰু বাংলাদেশ তথা অসমৰ বাবে আকাংক্ষিত লাভালাভৰ ওপৰত গুৰুত্ব আৰোপ কৰি ব্যতিক্ৰম মাছডোৰ প্ৰচেষ্টাক শলাগ লয়।
এই শিক্ষা সন্মিলনত প্ৰথিতযশা সাহিত্যিক মৌ ৰায়চৌধুৰীক শ্ৰদ্ধাঞ্জলি জ্ঞাপন কৰা হয়। অনুষ্ঠানত ড০ মৃদুল হাজৰিকা আৰু ড০ ফাৰহাদ জাহিদ শ্বেখকে ধৰি বিশিষ্ট শিক্ষাবিদ আৰু আগশাৰীৰ উদ্যোগীসকলক একত্ৰিত কৰিছিল, যিয়ে শৈক্ষিক সহযোগিতা আৰু ভৱিষ্যতৰ নিয়োগৰ প্ৰস্তুতিৰ ওপৰত গুৰুত্বপূৰ্ণ অন্তৰ্দৃষ্টি ভাগ বতৰা কৰে। এই সন্মিলনত সক্ৰিয়ভাৱে অংশগ্ৰহণ কৰে মহাপুৰুষ শ্ৰীমন্ত শংকৰদেৱ বিশ্ববিদ্যালয়, জেআইএছ বিশ্ববিদ্যালয় আৰু ঢাকা আন্তঃৰাষ্ট্ৰীয় বিশ্ববিদ্যালয়ৰ দৰে প্ৰতিষ্ঠিত বিশ্ববিদ্যালয়সমূহে। এই অনুষ্ঠানে শৈক্ষিক সম্পৰ্ক শক্তিশালী কৰাৰ লগতে ভাৰত আৰু বাংলাদেশৰ মাজত পাৰস্পৰিক বিকাশ আৰু বুজাবুজিৰ এক সংস্কৃতি গঢ়ি তোলাত এক গুৰুত্বপূৰ্ণ পদক্ষেপ হিচাপে চিহ্নিত হৈছে।