দক্ষতা বিকাশ আৰু উদ্যমিতা মন্ত্ৰালয়ে(এমএছডিই) ভাৰতৰ আগশাৰীৰ ফাৰ্ম ইকুইপমেণ্ট কোম্পানী আৰু আয়তনৰ দিশেৰে বিশ্বৰ সৰ্ববৃহৎ ট্ৰেক্টৰ নিৰ্মাতা প্ৰতিষ্ঠান মহিন্দ্ৰা এণ্ড মহিন্দ্ৰা লিমিটেডৰ সৈতে বুজাবুজিৰ চুক্তিত স্বাক্ষৰ কৰি ড্ৰ’ন দিদি যোজনাৰ অধীনত দুটা অভিলাষী পাইলট প্ৰকল্প পৰিচালনা কৰিছে। চলিত বৰ্ষৰ আৰম্ভণিতে আৰম্ভ হোৱা এই আঁচনিখনৰ জৰিয়তে ১৫,০০০ মহিলাক কৃষিৰ গুৰুত্বপূৰ্ণ পৰ্যায় যেনে সাৰ-বীজ সিঁচা, শস্যৰ নিৰীক্ষণ আৰু বীজ সিঁচাৰ বাবে ড্ৰন অপাৰেট কৰিবলৈ প্ৰশিক্ষণ প্ৰদান কৰিছে, যাৰ ফলত নতুন প্ৰযুক্তিৰ ক্ষেত্ৰখনত দক্ষতা প্ৰদানৰ জৰিয়তে মহিলাসকলৰ বাবে নতুন জীৱিকাৰ সুযোগ সৃষ্টি কৰা হৈছে।
এই অংশীদাৰিত্বৰ অধীনত এমএছডিই আৰু মহিন্দ্ৰাই হায়দৰাবাদ আৰু নয়দাৰ ৰাষ্ট্ৰীয় দক্ষতা প্ৰশিক্ষণ প্ৰতিষ্ঠান(এনএছটিআই)ত দুটা পাইলট পৰিচালনা কৰি নিৰ্বাচিত ২০গৰাকী মহিলাৰ এক্সক্লুছিভ বেটছৰ জৰিয়তে ৫০০গৰাকী মহিলাক দক্ষতা প্ৰদান কৰিব। অসামৰিক বিমান পৰিবহণ সঞ্চালকালয়ৰ অনুমোদিত ১৫ দিনীয়া পাঠ্যক্ৰম এই কেন্দ্ৰ দুটাত আৰপিটিঅ’ (ৰিম’ট পাইলট ট্ৰেইনিং অৰ্গেনাইজেচন)ৰ প্ৰশিক্ষকৰ জৰিয়তে প্ৰদান কৰা হ’ব।
ইয়াত অংশগ্ৰহণৰ বাবে স্থানীয় মহিলা আত্ম-সহায়ক গোট আৰু বে-চৰকাৰী সংগঠনসমূহক এনএছটিআইয়ে প্ৰশিক্ষণ আন্তঃগাঁথনি, হোষ্টেল প্ৰদান কৰিব। মহিন্দ্ৰা গ্ৰুপে চিমুলেচন যন্ত্ৰ, চিমুলেটৰ কণ্ট্ৰলাৰ, ছফ্টৱেৰ আৰু প্ৰশিক্ষকৰ জৰিয়তে প্ৰাৰম্ভিক সমৰ্থন প্ৰদান কৰিব। সকলোৰে সহযোগত এই পাইলট প্ৰকল্পৰ বাবে পৰিচালনা ব্যয়, ডিজিচিএ লাইচেঞ্চ হল্ডাৰ ইন্সট্ৰাক্টৰ(প্ৰশিক্ষক)সহ সকলো দিশ সামৰি লোৱা হ’ব। এমএছডিইৰ সচিব অতুল কুমাৰ তিৱাৰীয়ে এই বিষয়ে কয় যে, “আমি মহিন্দ্ৰা এণ্ড মহিন্দ্ৰা লিমিটেডৰ সৈতে আমাৰ অংশীদাৰিত্ব ঘোষণা কৰিবলৈ পাই উৎসাহিত হৈছো, এই পদক্ষেপৰ জৰিয়তে যাতে ব্যাপক প্ৰশিক্ষণ প্ৰদান কৰি কৃষি দক্ষতা বৃদ্ধি আৰু প্ৰয়োগ কৰিব পৰা যায়।”
