দেশত নলা চাফা কৰাৰ সময়ত হোৱা মৃত্যুৰ ঘটনাক গুৰুত্বসহকাৰে লৈ উচ্চতম ন্যায়ালয়ে শুকুৰবাৰে কয় যে চৰকাৰী বিষয়াসকলে মৃত্যু হোৱা লোকৰ পৰিয়ালক ৩০ লাখ টকা ক্ষতিপূৰণ দিব লাগিব। আদালতে কয় যে, ‘কেন্দ্ৰীয় আৰু ৰাজ্য চৰকাৰে নিশ্চিত কৰিব লাগে যাতে হাতেৰে নলা চাফা কৰা প্ৰথা সম্পূৰ্ণৰূপে নাইকিয়া হয়।’
ন্যায়াধীশ এছ ৰবীন্দ্ৰ ভাট আৰু ন্যায়াধীশ অৰবিন্দ কুমাৰৰ বিচাৰপীঠে কয় যে নলা পৰিষ্কাৰ কৰাৰ সময়ত স্থায়ী অক্ষমতাত ভুগি থকা লোকসকলক নূন্যতম ক্ষতিপূৰণ হিচাপে ২০ লাখ টকা প্ৰদান কৰা হ’ব।
ৰায়দান কৰাৰ সময়ত ন্যায়াধীশ ভাটে কয় যে যদি ছুইপাৰজন অন্য অক্ষমতাত ভুগিছে তেন্তে কৰ্তৃপক্ষই ১০ লাখ টকা পৰ্যন্ত ধন দিব লাগিব।
আদালতে আৰু কি নিৰ্দেশনা দিলে?
আদালতে কেইবাটাও নিৰ্দেশনা জাৰি কৰে। বিচাৰপীঠে নিৰ্দেশ দিয়ে যে চৰকাৰী সংস্থাসমূহে যাতে এনে ঘটনা সংঘটিত নহয় তাৰ বাবে সমন্বয় স্থাপন কৰিব লাগে আৰু ইয়াৰ উপৰিও উচ্চ ন্যায়ালয়সমূহে নলাৰ মৃত্যুৰ সৈতে জড়িত গোচৰসমূহ নিৰীক্ষণ কৰাত বাধা দিব নালাগে।
৫ বছৰত ৩৪৭ জন লোকৰ মৃত্যু
২০২২ চনৰ জুলাই মাহত লোকসভাত দাখিল কৰা চৰকাৰী তথ্য অনুসৰি ভাৰতত বিগত পাঁচ বছৰত নলা আৰু চেপ্টিক টেংক পৰিষ্কাৰ কৰাৰ সময়ত কমেও ৩৪৭ জন লোকৰ মৃত্যু হৈছিল, ইয়াৰে ৪০ শতাংশ মৃত্যু উত্তৰ প্ৰদেশ, তামিলনাডু আৰু দিল্লীত সংঘটিত হৈছে।
