ভাৰতীয় জনতা পাৰ্টিৰ শিৱসাগৰ নগৰ মণ্ডল মহিলা মৰ্চাৰ সভানেত্ৰী, শিৱসাগৰ পৌৰসভাৰ ১০নং ৱাৰ্ডৰ ৱাৰ্ড কমিছনাৰ উপমা বৰাৰ আকস্মিক মৃত্যু।
শিৱসাগৰ চহৰৰ প্ৰগতি নাৰ্ছিংহোমত শেষ নিশ্বাস ত্যাগ কৰে বৰাই।
সমাজসেৱিকাগৰাকী মৃত্যুৰ পিছতে চিকিৎসকৰ চূড়ান্ত অৱহেলা আৰু ভুল চিকিৎসাৰ বাবেই মৃত্যু হোৱাৰ অভিযোগ উত্থাপন হৈছে।
ইয়াৰ পিছতে নাৰ্ছিংহোম চৌহদত বহু লোক উপস্থিত হৈ উত্তপ্ত পৰিস্থিতিৰ সৃষ্টি কৰে।
শিৱসাগৰ পৌৰসভাৰ ১০ নং ৱাৰ্ডৰ ৱাৰ্ড, কমিছনাৰ তথা ফুকন নগৰৰ নিবাসী উপমা বৰা চিকিৎসকৰ অৱহেলাত মৃত্যু হোৱাৰ পিচতে নিশা নাৰ্ছিংহোমখনত সৃষ্টি হোৱা উত্তপ্ত পৰিস্থিতিৰ প্ৰতি লক্ষ্য ৰাখি প্ৰশাসনে নাৰ্ছিংহোমত পুলিচ চি আৰ পি বাহিনী নিয়োগ কৰে।
অতি নিষ্ঠাৰে ৰাজহুৱা কাম-কাজত সদাব্যস্ত জনপ্রিয় নেত্ৰীগৰাকীৰ মৃত্যু সন্দৰ্ভত ন্যায় বিচাৰি ৰাইজে নাৰ্ছিংহোম কর্তৃপক্ষক জবাবদিহি কৰে।
প্রাপ্ত বাতৰিমতে ৱাৰ্ড কমিছনাৰ উপমা বৰাই চাৰিদিনৰ পূৰ্বে প্ৰস্ৰাৱৰ ইনফেকচনৰ বাবে চিকিৎসকৰ পৰামৰ্শমৰ্মে প্ৰগতি নাৰ্ছিং হোমত ভৰ্তি হৈছিল। পূৰ্বৰে পৰা বহুমূত্ৰ ৰোগত আক্ৰান্ত উপমা বৰাৰ ছুগাৰৰ পৰিমাণ সঘন তাৰতম্য হোৱাৰ লগতে জ্বৰৰ পৰা উপশম পোৱা নাছিল।
এই সন্দৰ্ভত নাৰ্ছিংহোমৰ জ্যেষ্ঠ চিকিৎসকক অৱগত কৰাৰ লগতে ডিব্ৰুগড়লৈ উন্নত চিকিৎসাৰ বাবে যাব বিচাৰিছিল। কিন্তু চিকিৎসকগৰাকীয়ে ইয়াতে সেয়া সম্ভৱ বুলি অভয়বাণী দি চিকিৎসা চলাই গৈছিল।
ইফালে কৰ্তব্যৰত একাংশ নাৰ্ছৰ চিকিৎসা প্ৰদানৰ প্ৰাথমিক জ্ঞান নথকাৰো বিস্ফোৰক অভিযোগ তুলিছে পৰিয়ালৰ লোকে।
আনহাতে হঠাৎ স্বাস্থ্যৰ অৱনতি ঘটাত পৰিয়ালৰ লোকে চিকিৎসকৰ সৈতে ফোনযোগে আঠবাৰকৈ যোগাযোগৰ চেষ্টা চলায় যদিও চিকিৎসকগৰাকীয়ে ফোন ৰিছিভ নকৰিলে। অৱশেষত চিকিৎসকৰ চূড়ান্ত অৱহেলা আৰু ভুল চিকিৎসা তথা অনভিজ্ঞ নাৰ্ছৰ বাবেই নিশা উপমা বৰাৰ মৃত্যু হয় বুলি স্বামী ত্রিদিব বৰাই অভিযোগ উত্থাপন কৰিছে।
শেহতীয়াভাৱে ঘটনা সন্দৰ্ভত স্বামী ত্রিদিব বৰাই জিলা আৰক্ষী প্ৰশাসনৰ ওচৰত এখন লিখিত এজাহাৰ দাখিল কৰিছে।
মৃত্যুৰ সময়ত তেওঁ স্বামীৰ উপৰি এজন পুত্ৰ, এগৰাকী জীসহিতে বৃহৎ পৰিয়াল এটা ইহ সংসাৰত এৰি থৈ যায়।
