নিউজীলেণ্ডৰ পুৰুষ- মহিলা ক্ৰিকেটাৰসকলে সকলো ফৰ্মেটত লাভ কৰিব সমপৰ্যায়ৰ মেচ মাচুল

বিশ্ব ক্ৰিকেটত প্ৰথমবাৰৰ বাবে নিউজীলেণ্ড ক্ৰিকেট (এনজেডচি) আৰু খেলুৱৈ সন্থাৰ মাজত পাঁচ বছৰীয়া ঐতিহাসিক চুক্তিৰ পিছত দেশৰ পুৰুষ আৰু মহিলা ক্ৰিকেটাৰসকলে সকলো ফৰ্মেট আৰু প্ৰতিযোগিতাত একেই মেচ মাচুল লাভ কৰিব। এনজেডচিৰ মুখ্য কাৰ্যবাহী বিষয়া ডেভিদ হোৱাইটে এক বিবৃতিত কয়; ‘এনে এক গুৰুত্বপূৰ্ণ চুক্তিত উপনীত হোৱাত তেওঁলোকৰ ভূমিকাৰ বাবে মই খেলুৱৈ আৰু বৃহৎ সংগঠনসমূহক ধন্যবাদ আৰু অভিনন্দন জনাইছো। এইটো আমাৰ খেলৰ আটাইতকৈ গুৰুত্বপূৰ্ণ চুক্তি, যি এনজেডচি, ডাঙৰ সংগঠন আৰু আমাৰ খেলুৱৈৰ বাবে বাধ্যতামূলক হ’ব আৰু ক্ৰিকেটত পুঁজি, প্ৰগতি আৰু বিকাশৰ ভেটি স্থাপন কৰিব।’ এনজেডচি, ছয়টা মুখ্য সংগঠন আৰু নিউজীলেণ্ড ক্ৰিকেট খেলুৱৈ সন্থাৰ মাজত হোৱা ঐতিহাসিক চুক্তিৰ অধীনত, হোৱাইট ফাৰ্ণ (নিউজীলেণ্ডৰ ৰাষ্ট্ৰীয় মহিলা ক্ৰিকেট দল) আৰু ঘৰুৱা মহিলা খেলুৱৈসকলে সকলো ফৰ্মেট আৰু প্ৰতিযোগিতাত পুৰুষৰ সমান মেচ মাচুল লাভ কৰিব। ইয়াৰ অৰ্থ হৈছে যে শীৰ্ষ স্থানত থকা হোৱাইট ফাৰ্ণে বছৰি সৰ্বাধিক ১,৬৩,২৪৬ নিউজীলেণ্ড ডলাৰ (৮৩,৪৩২ নিউজীলেণ্ড ডলাৰৰ পৰা বৃদ্ধি) লাভ কৰিব, নৱম স্থানপ্ৰাপ্ত খেলুৱৈগৰাকীয়ে বছৰি ১,৪৮,৯৪৬ নিউজীলেণ্ড ডলাৰ (৬৬,২৬৬ নিউজীলেণ্ড ডলাৰৰ পৰা বৃদ্ধি) লাভ কৰিব আৰু ১৭ তম স্থানপ্ৰাপ্ত খেলুৱৈজনে বছৰি সৰ্বাধিক ১,৪২,৩৪৬ নিউজীলেণ্ড ডলাৰ (৬২ হাজাৰ ৮৩৩ নিউজীলেণ্ড ডলাৰৰ পৰা বৃদ্ধি) লাভ কৰিব।