আহমেদাবাদত এয়াৰ ইণ্ডিয়াৰ ১৭১ বিমান দুৰ্ঘটনাগ্ৰস্ত হোৱাৰ পিছত শেহতীয়াকৈ অসামৰিক বিমান পৰিবহণ মন্ত্ৰালয়ে এই দুৰ্ঘটনাটোৰ দ্বিস্তৰীয় তদন্তৰ কথা ঘোষণা কৰে। সেই অনুসৰি এতিয়া তদন্ত প্ৰক্ৰিয়া আৰম্ভ হৈছে। এয়াৰক্ৰাফ্ট এক্সিডেণ্ট ইনভেষ্টিগেচন ব্যুৰো (এএআইবি)ৰ দ্বাৰা কাৰিকৰী তদন্ত চলি থকাৰ বিপৰীতে দুৰ্ঘটনাটোৰ কাৰণ হোৱা সকলো সম্ভাৱনাৰ ওপৰত দৃষ্টি ৰাখিবলৈ এখন উচ্চ পৰ্যায়ৰ কমিটীও গঠন কৰা হৈছে। এই কমিটীয়ে ৩ মাহৰ ভিতৰত প্ৰতিবেদন দাখিল কৰিব। এক সংবাদমেলত অসামৰিক বিমান পৰিবহণ মন্ত্ৰী ৰামমোহন নাইডুৱে কয় যে ডিজিচিএৰ নিৰ্দেশ অনুসৰি এয়াৰ ইণ্ডিয়াৰ সকলো বয়িং ৭৮৭ বিমানো তদন্ত কৰা হ’ব। ভাৰতত উপস্থিত থকা ৩৪খন ড্ৰিমলাইনাৰৰ ভিতৰত ৮খন ইতিমধ্যে তদন্ত কৰা হৈছে। সংবাদ মাধ্যমৰ সৈতে হোৱা এক সাক্ষাৎকাৰত অসামৰিক বিমান পৰিবহণ মন্ত্ৰালয়ৰ সচিব সমীৰ কুমাৰ সিনহাইও দুৰ্ঘটনাৰ সময়সীমা নিশ্চিত কৰে। বিমানখনে নিৰ্ধাৰিত সময়ত দুপৰীয়া ১.৩৯ বজাত উৰা মাৰে, কিন্তু ৬৫০ ফুট পোৱাৰ পিছত বিমানখনে দ্ৰুতগতিত উচ্চতা হেৰুৱাবলৈ আৰম্ভ কৰাৰ বাবে কেইছেকেণ্ডমানৰ ভিতৰতে মেডে ফোন কৰা হয়।
বিমান পৰিবহণ নিয়ন্ত্ৰণৰ দ্বাৰা যোগাযোগ স্থাপনৰ প্ৰচেষ্টাত কোনো সঁহাৰি পোৱা নগ’ল। দুপৰীয়া ১.৪০ বজাৰ ভিতৰত আহমেদাবাদ বিমানবন্দৰৰ পৰা মাত্ৰ ২ কিলোমিটাৰ নিলগত মেঘনানী নগৰ অঞ্চলত বিমানখন দুৰ্ঘটনাগ্ৰস্ত হয়। আহমেদাবাদৰ চৰ্দাৰ বল্লভভাই পেটেল বিমানবন্দৰৰ পৰা লণ্ডনলৈ যোৱা এই বয়িং ৭৮৭-৮ বিমানখনত মুঠ ২৪২ জন লোক আছিল, ইয়াৰে ২৪১ জনৰ মৃত্যু হৈছিল। বিজে মেডিকেল কলেজৰ হোষ্টেলৰ মেছত বিমানখন দুৰ্ঘটনাগ্ৰস্ত হোৱাৰ ফলত আন বহু লোকৰো মৃত্যু হয় আৰু মুঠ মৃত্যুৰ সংখ্যা ২৭০লৈ বৃদ্ধি পায়। শুকুৰবাৰে সন্ধিয়া ৫ বজাত হোষ্টেলৰ মেছৰ চাদৰ পৰা উদ্ধাৰ কৰে ব্লেক বক্স। গুজৰাটত চলি আছে ডি এন এৰ নমুনা নিষ্কাশন, প্ৰফাইলিং আৰু মিলন প্ৰক্ৰিয়া। ইতিমধ্যে ডি এন এ পৰীক্ষাৰ অন্তত কেইবাটাও পৰিয়ালক মৃতদেহ দিয়া হৈছে।
নাইডুৱে জনোৱা মতে, এয়াৰ ইণ্ডিয়াকো মৃতকৰ পৰিয়াললৈ বীমাৰ ধন ক্ষিপ্ৰতাৰে প্ৰদান কৰিবলৈ নিৰ্দেশ দিয়া হৈছে। তদন্ত সন্দৰ্ভত মন্ত্ৰী নাইডুৱে কয় যে এএআইবি (এয়াৰক্ৰাফ্ট এক্সিডেণ্ট ইনভেষ্টিগেচন ব্যুৰো)ৰ কাৰিকৰী তদন্ত চলি আছে আৰু ডিজিটেল ফ্লাইট ভিডিঅ’ ৰেকৰ্ডাৰ ডিকোডিং প্ৰক্ৰিয়া আৰম্ভ হৈছে। তেওঁ কয় যে এএআইবিৰ এই তদন্ত বহুবিষয়ক দলে কৰিব, য’ত চিকিৎসা আৰু ফৰেনছিক বিশেষজ্ঞও থাকিব।আনহাতে, প্ৰথমবাৰৰ বাবে এখন উচ্চ পৰ্যায়ৰ সমিতি গঠন কৰা হৈছে, যিয়ে ৩ মাহৰ ভিতৰত প্ৰতিবেদন দাখিল কৰিব। এই কমিটীয়ে দুৰ্ঘটনাৰ সকলো সম্ভাৱ্য কাৰণৰ তদন্ত কৰি ষ্টেণ্ডাৰ্ড অপাৰেটিং প্ৰচিডিউৰ (এছ অ’ পি), সুৰক্ষাৰ মানদণ্ড পৰ্যালোচনা কৰি ভৱিষ্যতে এনেধৰণৰ ঘটনা ৰোধৰ বাবে নিৰ্দেশনা প্ৰস্তুত কৰিব।
