যিমানেই ‘ধুৰন্ধৰ’ নহওক কিয়, ‘চান্দা চোৰ’ বুলি অভিযুক্ত কোনো লোককেই ৰেহাই নাপাব। বাৰাণসীত মুখ্যমন্ত্ৰী যোগী আদিত্যনাথৰ উপস্থিতিত অনুষ্ঠিত এক অনুষ্ঠানত ৰাম মন্দিৰৰ দানৰ ধনক কেন্দ্ৰ কৰি উত্থাপিত অভিযোগৰ প্ৰসংগত এই মন্তব্য কৰে উত্তৰ প্ৰদেশৰ মাধ্যমিক শিক্ষা মন্ত্ৰী গুলাব দেৱীয়ে।
মন্ত্ৰীগৰাকীয়ে কয় যে দোষী ব্যক্তি যিমানেই প্ৰভাৱশালী নহওক বা যিকোনো পদত অধিষ্ঠিতেই নাথাকক কিয়, তদন্তত অপৰাধ প্ৰমাণিত হ’লে আইন অনুসৰিয়েই তেওঁৰ বিৰুদ্ধে ব্যৱস্থা গ্ৰহণ কৰা হ’ব।
গুলাব দেৱীয়ে কয়, “ৰাম মন্দিৰৰ বিষয়ত মুখ্যমন্ত্ৰীয়ে এনে এখন তদন্ত সমিতি গঠন কৰিছে যে দোষী যিমানেই প্ৰভাৱশালী নহওক কিয়, তেওঁক কোনোপধ্যে ৰেহাই দিয়া নহ’ব।”
তেওঁ আৰু কয়, “মুখ্যমন্ত্ৰীৰ এই কঠোৰ সিদ্ধান্তৰ ফলত কোনো ‘চান্দা চোৰ’ আইনৰ সুৰুঙাৰে বাচি যাব নোৱাৰিব। সেই ব্যক্তি যিমানেই প্ৰভাৱশালী নহওক বা যিকোনো পদত নাথাকক কিয়, তেওঁৰ বিৰুদ্ধে আইন অনুসৰিয়েই ব্যৱস্থা গ্ৰহণ কৰা হ’ব।”
দুৰ্নীতিৰ বিৰুদ্ধে যোগী আদিত্যনাথ চৰকাৰে শূন্য সহনশীল নীতি গ্ৰহণ কৰিছে বুলিও উল্লেখ কৰে মন্ত্ৰীগৰাকীয়ে। ৰাম মন্দিৰৰ দানৰ ধনক কেন্দ্ৰ কৰি উত্থাপিত অভিযোগৰ তদন্তৰ বাবে বিশেষ তদন্তকাৰী দল গঠন কৰাৰ সিদ্ধান্তৰ কৃতিত্ব মুখ্যমন্ত্ৰীৰেই প্ৰাপ্য বুলিও তেওঁ মন্তব্য কৰে।
তদন্তত যি তথ্য পোহৰলৈ আহিব, সেই অনুসৰিয়েই চৰকাৰে আইনী ব্যৱস্থা গ্ৰহণ কৰিব বুলি গুলাব দেৱীয়ে স্পষ্ট কৰে। তেওঁৰ ভাষাত, জনসাধাৰণৰ আস্থা অক্ষুণ্ণ ৰখা আৰু শাসন ব্যৱস্থাত স্বচ্ছতা নিশ্চিত কৰাই এই পদক্ষেপৰ মূল উদ্দেশ্য।
উল্লেখ্য যে, ৰাম মন্দিৰৰ দানৰ ধন ব্যৱহাৰক কেন্দ্ৰ কৰি উত্থাপিত অভিযোগৰ তদন্তৰ বাবে উত্তৰ প্ৰদেশ চৰকাৰে ইতিমধ্যে বিশেষ তদন্তকাৰী দল গঠন কৰিছে। তদন্ত সম্পূৰ্ণ হোৱাৰ পিছত প্ৰতিবেদনৰ ভিত্তিত পৰৱৰ্তী ব্যৱস্থা গ্ৰহণ কৰা হ’ব।
একেটা অনুষ্ঠানতে ১২ লাখ শিক্ষক, অশিক্ষক কৰ্মচাৰী আৰু তেওঁলোকৰ পৰিয়ালৰ সদস্যসকলৰ স্বাস্থ্য সুৰক্ষাৰ লক্ষ্যৰে ‘মুখ্যমন্ত্ৰী শিক্ষক কেছলেছ চিকিৎসা আঁচনি’ও শুভাৰম্ভ কৰা হয়।
