অৰবিন্দ কেজৰিৱালক গ্ৰেপ্তাৰৰ প্ৰতিবাদ আৰু কাৰাগাৰত তেওঁৰ অসুস্থতাৰ পৰ্যাপ্ত চিকিৎসাৰ পৰা বঞ্চিত কৰাৰ অভিযোগত চচলত বিক্ষোভ কাৰ্যসূচী ৰূপায়ন কৰে আপৰ উপৰি ইণ্ডিয়া জোঁটৰ অংশীদাৰ দলসমূহে।আপৰ ৰাজ্যিক সভাপতি ডাঃ ভবেন চৌধুৰীৰ নেতৃত্বত শতাধিক প্ৰতিবাদকাৰীয়ে অংশগ্ৰহণ কৰা বিক্ষোভ কাৰ্যসূচীত ইণ্ডিয়া জোঁটৰ অংশীদাৰ হিচাপে কংগ্ৰেছ, চিপিআই( এম), এনচিপি, তৃণমূল কংগ্ৰেছ, ফৰৱাৰ্ড ব্লক আৰু আৰ জে ডি দলৰ প্ৰতিনিধিয়ে অংশগ্ৰহণ কৰে। কাৰ্যসূচীত আপৰ উপৰি ইণ্ডিয়া জোঁটৰ এগৰাকী শীৰ্ষ নেতা তথা দিল্লীৰ মুখ্যমন্ত্ৰী অৰবিন্দ কেজৰিৱালৰ বিৰুদ্ধে কেন্দ্ৰীয় চৰকাৰে চলোৱা ষড়যন্ত্ৰৰ বিৰুদ্ধে সৰৱ হয় ডাঃ ভবেন চৌধুৰী। তেওঁ কয়, ” কেন্দ্ৰৰ শাসনাধিষ্ঠিত নৰেন্দ্ৰ মোদী চৰকাৰে ষড়যন্ত্ৰমূলক ভাৱে মুখ্যমন্ত্ৰী অৰবিন্দ কেজৰিৱালক বিনা বিচাৰে গ্ৰেপ্তাৰ কৰি ৰাখিছে।
হাস্পতালত মুখ্যমন্ত্ৰী কেজৰিৱালৰ স্বাস্থ্যৰ যথেষ্ট অৱনতি হৈছে। তেজত শৰ্কৰাৰ পৰিমাণ কমিছে। তেওঁৰ ওজন অস্বাভাৱিক ভাবে হ্ৰাস পাইছে।কিন্তু চৰকাৰে তেওঁক পৰ্যাপ্ত চিকিৎসা সেৱা আগবঢ়োৱা নাই। বিজেপিয়ে কাৰাগাৰত কেজৰিৱালক হত্যাৰ চক্ৰান্ত কৰিছে। গুৱাহাটীৰ চচলত অনুষ্ঠিত প্ৰতিবাদস্থলীত আপৰ বিক্ষোভত যোগ দিয়ে প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰাই। প্ৰদেশ কংগ্ৰেছৰ সভাপতি ভূপেন বৰাৰ প্ৰতিনিধি হিচাপে অংশগ্ৰহণ কৰা বেদব্ৰত বৰাই কয়, “কেজৰিৱালৰ দৰে এগৰাকী উচ্চ শিক্ষিত তথা দুৰ্নীতিমুক্ত নেতাক কোনো প্ৰমাণ অবিহনে গ্ৰেপ্তাৰ কৰাটো চৰকাৰৰ স্বৈৰাচাৰী নীতিৰ বহিঃপ্ৰকাশ। মুখ্যমন্ত্ৰী কেজৰিৱালৰ গ্ৰেপ্তাৰক গণতন্ত্ৰ বিৰোধী বুলি আখ্যা দিয়ে নয়ন ভূঞাই।
বাওঁপন্থী নেতাগৰাকীৰ মতে,” কেজৰিৱাল এটা ৰাষ্ট্ৰীয় দলৰ মুৰব্বী আৰু দিল্লীত অভিলেখ সংখ্যক ভোটেৰে নিৰ্বাচিত এজন জনপ্ৰিয় মুখ্যমন্ত্ৰী। তেওঁৰ গ্ৰেপ্তাৰৰ জৰিয়তে কেন্দ্ৰৰ মোদী চৰকাৰে সংবিধান আৰু গণতন্ত্ৰ হত্যা কৰিব খুজিছে। কেজৰিৱালক কাৰাবন্দী কৰি ৰখাৰ তীব্ৰ বিৰোধিতা কৰোঁ। আমি অবিলম্বে নেতাগৰাকীৰ মুক্তি বিচাৰোঁ। “প্ৰতিবাদী কাৰ্যসূচীত তৃণমূল কংগ্ৰেছৰ সাধাৰণ সম্পাদক অৰূপজ্যোতি ভূঞা, মুখপাত্ৰ পলাশী দাস, কোষাধ্যক্ষ ঘনকান্ত শইকীয়া, ফৰৱাৰ্ড ব্লকৰ মিহিৰ নন্দী, আৰ জে ডিৰ যুৱ নেতা কামাখ্যা পাণ্ডে, এন চি পিৰ পৰেশ বৰুৱায়ো অংশগ্ৰহণ কৰি চৰকাৰৰ স্বৈৰাচাৰী নীতিৰ বিৰুদ্ধে সৰৱ হয়। প্ৰতিগৰাকী নেতাই ইডি আৰু চিবিআইৰ ভূমিকাৰ কটু সমালোচনা কৰে।