কয়াকুছি বজাৰৰ কুমুৰুদ্দিন মাৰ্কেটত কমৰেড আফাক হোছাইন আৰু জাহিৰুল ইছলামৰ সভাপতিত্বৰে অনুষ্ঠিত হোৱা প্ৰতিনিধি সভাত বৃহত্তৰ কয়াকুছি অঞ্চলৰ বিভিন্ন প্ৰান্তৰ শাখা কমিটি, বিদ্যালয়সমূহৰ শাখা কমিটিৰ পৰা প্ৰায় পঞ্চাশগৰাকী প্ৰতিনিধিৰে সভা সুকলমে অনুষ্ঠিত হয়। সন্মিলনৰ পতাকা উত্তোলন কৰে আঞ্চলিক কমিটিৰ সভাপতি কমৰেড শ্বাহিনুৰ ইছলামে | ইয়াৰ পাছত শ্বহীদ বেদীত শ্ৰদ্ধাঞ্জলি অনুষ্ঠানত মাল্যাৰ্পণ কৰে ভাৰতৰ ছাত্ৰ ফেডাৰেচনৰ ৰাজ্যিক কমিটিৰ সদস্য কমৰেড ৰেকিবুল হুছেইন আৰু ৰাজ্যিক কমিটিৰ সদস্য কমৰেড চৈয়দ আফতাদ হুছেইনে।
প্ৰতিনিধি সভাত বৰপেটা জিলা উপ-সভাপতি কমৰেড শ্বাহাজুল ইছলামে শোক প্ৰস্তাৱ উত্থাপন কৰাৰ পাছতে ৰাজ্যিক সম্পাদক মণ্ডলীৰ সদস্য কমৰেড মইনুল হক চৌধুৰীয়ে আদৰণি ভাষণ প্ৰদান কৰে। ৰাজনৈতিক আৰু সাংগঠনিক প্ৰতিবেদন (খচৰা) পাঠ কৰে কয়াকুছি আঞ্চলিক কমিটিৰ সম্পাদক দেৱান ইফতিকাৰ হুছেইনে। শিক্ষা সমস্যাৰ ওপৰত প্ৰস্তাৱ, সাম্প্ৰদায়িকতাবাদ বিৰোধী প্ৰস্তাৱ, স্থানীয় সমস্যা সমাধানৰ ওপৰত প্ৰস্তাৱ, ছাত্ৰী সমস্যাৰ ওপৰত প্ৰস্তাৱ আদি প্ৰস্তাৱসমূহ সৰ্বসন্মতিমৰ্মে গৃহীত হয়।
প্ৰতিনিধি সভাৰ শেষত ১৯ জনীয়া কমিটিৰ নেতৃত্বত ধৰ্ষণকাৰীক কঠোৰ শাস্তি দিয়া, নাৰীৰ নিৰাপত্তা সুনিশ্চিত কৰা আৰু স্মাৰ্ট মিটাৰৰ নামত লুণ্ঠন বন্ধ কৰাৰ দাবীত প্ৰতিবাদী সমদল উলিওৱা হয় আৰু কয়াকুছি বাজাৰ উত্তাল কৰে।
