কাছাৰ জিলাত এক বৃহৎ ড্ৰাগছ বিৰোধী অভিযানত অসম আৰক্ষীয়ে প্ৰায় ১ কোটি টকা মূল্যৰ ১০,০০০ টা ইয়াবা টেবলেট জব্দ কৰিছে। ই ৰাজ্যখনৰ ড্ৰাগছ সৰবৰাহকাৰী নেটৱৰ্কসমূহৰ বাবে আন এক আঘাত।
মুখ্যমন্ত্ৰী হিমন্ত বিশ্ব শৰ্মাই কয় যে নিৰ্দিষ্ট চোৰাংচোৱা তথ্যৰ ভিত্তিত এই অভিযান চলোৱা হৈছিল। এখন আচবাবৰ দোকানৰ আঁৰত চলি থকা এটা গোপন ইউনিটৰ পৰা এই নিচাযুক্ত দ্ৰব্যখিনি উদ্ধাৰ কৰা হয়। জব্দৰ সৈতে জড়িত এজন লোকক গ্ৰেপ্তাৰ কৰা হৈছে।
ছ’চিয়েল মিডিয়া প্লেটফৰ্ম X-ত এই ঘটনা সদৰী কৰি শৰ্মাই কয় যে আন এক বৃহৎ ড্ৰাগছ জব্দৰ মাত্ৰ এদিন পিছতে এই সফল অভিযান চলিল। ই ৰাজ্যিক আৰক্ষীয়ে নিচাযুক্ত দ্ৰব্যৰ চক্ৰৰ বিৰুদ্ধে চলোৱা নিৰন্তৰ অভিযানকে প্ৰতিফলিত কৰে।
“এটা ডাঙৰ সফলতাৰ মাত্ৰ ২৪ ঘণ্টা পিছতে আন এটা জালত পৰিল! চোৰাংচোৱা তথ্যৰ ভিত্তিত চলোৱা অভিযানত কাছাৰ আৰক্ষীয়ে আচবাবৰ দোকানৰ আঁৰত লুকাই থকা এটা গোপন ইউনিটৰ পৰা প্ৰায় ১ কোটি টকা মূল্যৰ ১০,০০০ ইয়াবা টেবলেট উদ্ধাৰ কৰি এজন অভিযুক্তক আটক কৰে। অসম আৰক্ষীয়ে এৰা দিয়া নাই,” মুখ্যমন্ত্ৰীয় পোষ্ট কৰে।
জব্দ কৰা নিচাযুক্ত দ্ৰব্যৰ উৎস আৰু ড্ৰাগছ সৰবৰাহকাৰী নেটৱৰ্কৰ আন সদস্যসকলক চিনাক্ত কৰিবলৈ আৰক্ষীয়ে বিশদ তদন্ত আৰম্ভ কৰিছে।
