সদৌ অসম ছাত্র সন্থাৰ সাধাৰণ সম্পাদকৰূপে নিৰ্বাচিত হ’ল সমীৰণ ফুকন। ঐতিহাসিক তলাতল ঘৰ প্ৰাংগনৰ চাওলুং চ্যুকাফা সমন্বয় ক্ষেত্রত দুদিনীয়া কাৰ্যসূচীৰে অনুষ্ঠিত হোৱা আছুৰ সাধাৰণ সভাত সমীৰণ ফুকনক সদৌ অসম ছাত্র সন্থাৰ সাধাৰণ সম্পাদক হিচাপে নিৰ্বাচিত কৰা হয়।
সোমবাৰে নিশা আছুৰ সাধাৰণ সম্পাদক হিচাপে শিৱসাগৰৰ ছাত্ৰনেতা সমীৰণ ফুকনৰ ওপৰত দায়িত্বভাৰ অৰ্পণ কৰা হয়। উল্লেখ্য যে বিতৰ্কৰ বাবে আছুৰ সাধাৰণ সম্পাদক শংকৰজ্যোতি বৰুৱাই পদত্যাগ কৰাৰ পিছৰে পৰা খালী হৈ আছিল সদৌ অসম ছাত্র সন্থাৰ সাধাৰণ সম্পাদকৰ পদটো।
চার্জুন হাঞ্চেক ভাৰপ্ৰাপ্ত সাধাৰণ সম্পাদকৰ দায়িত্ব দিয়াৰ পিছত এই স্থায়ী পদটোক লৈ জল্পনা-কল্পনা অব্যাহত থকাৰ মাজতেই ঘোষণা হয় সদৌ অসম ছাত্র সন্থাৰ সাধাৰণ সম্পাদকগৰাকীৰ নাম। তেওঁ অহা তিনিটা বছৰলৈ সম্পাদকৰ দায়িত্বত থাকিব।
