ৰাজ্যত পুনৰ বৃদ্ধি টোলগেটৰ মাচুল। ১০ মাহত দ্বিতীয়বাৰলৈ বৃদ্ধি কৰা হ’ল টোল কৰ। ১ এপ্ৰিলৰ মাজনিশাৰ পৰা ৫-১০ শতাংশলৈ বৃদ্ধি পালে টোল কৰ। নাজিৰাখাট টোলগেট আৰু ৰহা টোলগেট পাৰ হওঁতে ভৰিব লাগিব অতিৰিক্ত মাচুল। ইফালে যদি ৰাষ্ট্ৰীয় ঘাইপথৰ শোচনী অৱস্থা, আনফালে আকৌ ৰাজ্যত বৃদ্ধি হ’ল টোল কৰ। প্ৰতিখন টোল গেটত এখন সৰু বহনে দিব লাগিব ৫-১০ টকা। লগতে গধুৰ সামগ্রী কঢ়িওৱা যান-বাহনৰ বাবে ২০-২৫ টকা পৰ্যন্ত বৃদ্ধি কৰা হৈছে। ৯০০ বিধ ঔষধৰ দাম বৃদ্ধিৰ পাছতে টোল কৰ বৃদ্ধিক লৈ এতিয়া ক্ষোভ উজাৰিছে সাধাৰণ নাগৰিক তথা বাণিজ্যিক যান বাহনৰ গৰাকীসকলে।অসমত পুনৰ তিনিখনকৈ টোলগেট মুকলি কৰাৰ বাবে সিদ্ধান্ত গ্ৰহণ কৰিছে কেন্দ্ৰীয় চৰকাৰে । ৰাষ্ট্ৰীয় ঘাইপথ প্ৰাধিকৰণৰ গুৱাহাটীস্থ আঞ্চলিক কাৰ্যালয়ৰ এগৰাকী কাৰ্যবাহী বিষয়াই সদৰী কৰা অনুসৰি ৰাজ্যখনত স্থাপন কৰিবলগীয়া প্ৰস্তাৱিত টোলগেটসমূহ মুকলি কৰাৰ বাবে চলাই থকা হৈছে প্ৰস্তুতি । জনোৱা অনুসৰি শীঘ্ৰেই মুকলি কৰা হ’ব কলিয়াবৰ আৰু তেজপুৰৰ মাজত চুলুঙত, দেৰগাঁৱৰ সমীপৰ ৰঙামাটিত আৰু বিশ্বনাথ চাৰিআলিৰ সমীপৰ মোনাবাৰীত টোলগেট ।মঙলবাৰে মাজনিশাৰ পৰা বাঢ়িল টোল গেটৰ কৰ। হিচাপ কৰি চালে, পূৰ্বে সোণাপুৰৰ নাজিৰাখাট টোলগেটত লঘু ব্যক্তিগত বাহনত লৈছিল ১৪০ টকা। এতিয়াৰে পৰা তাৰ ঠাইত দিব লাগিব ১৪৫ টকা। পূৰ্বৰ লঘু ব্যক্তিগত বাহনৰ অহা যোৱাৰ বাবদ ২০৪ টকাৰ সলনি দিব লাগিব ২১৫ টকা। একেদৰে লঘু বাণিজ্যিক বাহনে ২২০ টকাৰ ঠাইত দিব লাগিব ২৩০ টকা। এদিনত অহা যোৱাৰ নামত পূৰ্বে লৈছিল ৩৩৫ টকা কিন্তু এতিয়া হ’লগৈ ৩৪৫ টকা। পূৰ্বে বাছ-ট্রাকৰ বাবে টোলগেট দিব লাগিছিল ৪৬৫ টকা, এতিয়া দিব লাগিব ৪৮০ টকা।
