গুৱাহাটীত অনুষ্ঠিত ‘এন ডি এ পঞ্চায়ত প্ৰতিনিধি সন্মিলন’ত অংশগ্ৰহণ কৰে কেন্দ্ৰীয় গৃহমন্ত্ৰী অমিত শ্বাহ। শুকুৰবাৰে অনুষ্ঠিত এই অনুষ্ঠানত তেওঁ ভাষণত কয়- নৰেন্দ্ৰ মোদীয়ে উত্তৰ-পূবত ১১ বছৰৰ ভিতৰত যি শান্তিৰ যুগ স্থাপন কৰে, ইয়াৰ ভাষা, সংস্কৃতি আৰু শিল্পক যিদৰে সন্মান দিয়ে, তাৰ ফলত আজি অসমত দুবাৰকৈ এন ডি এ চৰকাৰ গঠন হৈছে। অসমত পঞ্চায়তৰ পৰা সংসদলৈ বিজেপি, অসম গণ পৰিষদ আৰু আমাৰ সহযোগীসকলৰ আধিপত্য সকলোতে বাঢ়িছে। প্ৰধানমন্ত্ৰী নৰেন্দ্ৰ মোদীয়ে উত্তৰ-পূৰ্বাঞ্চলত উন্নয়নৰ এক নতুন যুগ আৰম্ভ কৰিলে। আমাৰ নেতা তথা মুখ্যমন্ত্ৰী হিমন্ত বিশ্ব শৰ্মাই ইয়াক অসমৰ প্ৰতিখন গাওঁ, প্ৰতিজন ব্যক্তিলৈ লৈ যোৱাৰ কাম কৰিছে।
তাৰ ফলত বাৰে বাৰে বিজেপি জয়ী হয়। অমিত শ্বাহে আৰু কয়, এই নিৰ্বাচনৰ গুৰুত্ব অতিশয় অধিক আছিল, কাৰণ অসমৰ সীমা নিৰ্ধাৰণৰ পিছত এইটো আছিল প্ৰথম নিৰ্বাচন। ১৯৮০ চনৰ পিছত প্ৰথমবাৰৰ বাবে পঞ্চায়ত নিৰ্বাচনত ৭৪%তকৈ অধিক ভোটদান হৈছে। লোকসভাতো ১৪খন আসনৰ ভিতৰত ১১খন বিজেপিয়ে জয়লাভ কৰে, ৰাজ্যসভাৰ পাঁচখন আসনত এন ডি এয়ে জয়লাভ কৰে। আৰু ২০২১ চনৰ পৰা অনুষ্ঠিত হোৱা ১১টা উপ-নিৰ্বাচনত এন ডি এয়ে সকলো জয় কৰিছে।
জিলা পৰিষদৰ ৩৯৭খন আসনৰ ভিতৰত বিজেপিয়ে ৩০১খন, তহচিল পঞ্চায়তৰ ২১৮৮খন আসনৰ ভিতৰত এনডিএয়ে ১৪৪৫খন আসন আৰু পঞ্চায়ত পৰ্যায়ৰ ১৫ হাজাৰ লোক নিৰ্বাচিত হয়। তেওঁ লগতে কয় যে ১ লাখ চাকৰি দিম বুলি প্ৰতিশ্ৰুতি দিছিলোঁ। কিন্তু, মাত্ৰ ৪ বছৰত আমি ইয়াত ১ লাখ ২১ হাজাৰ চৰকাৰী চাকৰি দিছো। নিযুক্তিত কোনো ঠাইত দুৰ্নীতিও হোৱা নাই। মোৰ বিশ্বাস যে নিৰ্বাচনৰ আগতে আমি ১.৫ লাখ চাকৰি দিয়াৰ পৰিসংখ্যাটো স্পৰ্শ কৰিম।
