ভাৰত চৰকাৰে মনু ভাকৰ আৰু ডি গুকেশকে ধৰি ৪ জন খেলুৱৈক খেল ৰত্ন বঁটা প্ৰদান কৰাৰ সিদ্ধান্ত লৈছে। একে সময়তে, ৩২ জন খেলুৱৈয়ে অৰ্জুন বঁটা লাভ কৰিব। মনু ভাকাৰ আৰু ডি গুকেশৰ উপৰিও হকী খেলুৱৈ হৰমনপ্ৰীত সিং আৰু পেৰা-এথলীট খেলুৱৈ প্ৰবীণ কুমাৰকো খেল ৰত্ন বঁটা প্ৰদান কৰা হৈছে। পূৰ্বে খবৰ প্ৰকাশ পাইছিল যে খেল ৰত্নৰ বাবে মনু ভাকাৰৰ নাম বাছনি কৰা হোৱা নাই কিন্তু এতিয়া এই কিংবদন্তি খেলুৱৈজনে দেশৰ আটাইতকৈ ডাঙৰ ক্ৰীড়া বঁটা লাভ কৰিব। মনু ভাকাৰে পেৰিছ অলিম্পিকত ১০ মিটাৰ এয়াৰ পিষ্টল আৰু ২৫ মিটাৰ এয়াৰ পিষ্টলত ব্ৰঞ্জৰ পদক জিকিছিল।
একেখন অলিম্পিকত দুটা পদক জয় কৰা তেওঁ প্ৰথম ভাৰতীয়। দবা খেলুৱৈ ডি গুকেশকো খেল ৰত্ন বঁটাৰে সন্মানিত কৰা হ’ব। গুকেশে যোৱা মাহৰ ১২ ডিচেম্বৰত দবা জগতৰ বিশ্ব চেম্পিয়ন হোৱাৰ গৌৰৱ লাভ কৰিছিল। ছিংগাপুৰত অনুষ্ঠিত বিশ্ব চেম্পিয়নশ্বিপত গুকেশে চীনৰ ডিং লিৰেনক পৰাস্ত কৰি খিতাপ অৰ্জন কৰে। তেওঁ মাত্ৰ ১৮ বছৰ বয়সত বিশ্ব চেম্পিয়ন হৈছিল, যি হৈছে এক বিশ্ব অভিলেখ। হকী দলৰ অধিনায়ক হৰমনপ্ৰীত সিং আৰু পেৰালিম্পিকৰ স্বৰ্ণ পদক বিজয়ী প্ৰবীণ কুমাৰকো খেল ৰত্ন বঁটা প্ৰদান কৰা হ’ব।
হৰমনপ্ৰীত সিঙৰ অধিনায়কত্বত ভাৰতীয় দলে একেৰাহে দ্বিতীয়বাৰৰ বাবে অলিম্পিকত ব্ৰঞ্জৰ পদক অৰ্জন কৰে। হাই জাম্প টি৬৪ ইভেণ্টত প্ৰবীণ কুমাৰে দেশৰ হৈ সোণৰ পদক জিকিছিল। প্ৰবীণ কুমাৰে এছিয়ান অভিলেখ ভংগ কৰি এই কৃতিত্ব অৰ্জন কৰিছিল। ক্ৰীড়া মন্ত্ৰালয়ে ৩২ জন খেলুৱৈক সন্মানিত কৰিব, যাৰ ভিতৰত ১৭ জন পেৰা-এথলীট।
