ৰহস্যজনকভাৱে বাটৰ কুকুৰ নিৰুদ্দেশ হোৱা ঘটনাই আতংকৰ সৃষ্টি কৰি থকাৰ মাজতে মঙলবাৰে পুৱতি নিশা ডিব্ৰুগড় আৰক্ষীয়ে এক বৃহৎ কুকুৰ নিধন চক্ৰৰ বিৰুদ্ধে সফলতা লাভ কৰে। নিয়মীয়া নৈশ তহলৰ সময়ত সন্দেহজনকভাৱে ঘূৰি ফুৰা এখন বাহনৰ পিছা কৰি আৰক্ষীয়ে তিনিজন লোকক কৰায়ত্ত কৰাৰ লগতে কুকুৰ ধৰাৰ বাবে ব্যৱহৃত বহু আপত্তিজনক সামগ্ৰী জব্দ কৰিবলৈ সক্ষম হয়। আৰক্ষীৰ পৰা প্ৰাপ্ত তথ্য অনুসৰি, মঙলবাৰে নিশা প্ৰায় ২ বজাত এটা আৰক্ষী জোৱানৰ দলে এ এচ-০২জেড-৫৩৮৬ নম্বৰৰ এখন বাহনক সন্দেহজনক অৱস্থাত লক্ষ্য কৰে। বাহনখনক খেদি গৈ আটক কৰাৰ পাছত আৰক্ষীয়ে কাৰ্বি আংলং জিলাৰ নিবাসী চিয়ংকিৰি ৰংফাৰ (২৭), ৱাইচং ৰংপি (২৮) আৰু চেনচেন হামছে (২১) নামৰ তিনিজন যুৱকক গ্ৰপ্তাৰ কৰে।
বাহনখনত তালাচী চলাই আৰক্ষীয়ে কুকুৰ ধৰিবলৈ ব্যৱহাৰ কৰা ১৫ টা চাউলৰ বস্তা, ৰছী, বিস্কুটৰ পেকেট আৰু তিনিটাকৈ মোবাইল ফোন জব্দ কৰে। এই উদ্ধাৰ কাৰ্যই ডিব্ৰুগড়ত দীৰ্ঘদিন ধৰি চলাই থকা কুকুৰ নিধনৰ এক পৰিকল্পিত চক্ৰৰ অস্তিত্বক দৃঢ় কৰি তুলিছে। আৰক্ষীয়ে সন্দেহ কৰিছে যে এই চক্ৰটোৱে নিশাৰ অন্ধকাৰত বাটৰ কুকুৰসমূহক বিস্কুটৰ টোপ দি ধৰি বস্তাত ভৰাই আন্তঃজিলা বা বহিঃৰাজ্যলৈ সৰবৰাহ কৰাৰ কামত জড়িত আছিল। বৰ্তমান জ্যেষ্ঠ আৰক্ষী বিষয়াসকলে ধৃত লোককেইজনক জেৰা চলাই থকাৰ লগতে তেওঁলোকৰ মোবাইল ফোনৰ কল ৰেকৰ্ড আৰু ডিজিটেল তথ্যসমূহ পৰীক্ষা কৰিছে। এই ঘটনাৰ পাছতে জীৱ-জন্তু সুৰক্ষা কৰ্মী আৰু স্থানীয় ৰাইজে দোষীৰ বিৰুদ্ধে কঠোৰ আইনী ব্যৱস্থা গ্ৰহণৰ দাবী জনাইছে। আৰক্ষীয়ে এই চক্ৰটোৰ সৈতে আন কোনো বৃহৎ নেটৱৰ্ক জড়িত আছে নেকি, সেই দিশৰ পৰা তদন্ত অব্যাহত ৰাখিছে।
