আগন্তুক বিধানসভা নিৰ্বাচনক লৈ ৰাজ্যৰ ৰাজনীতি উত্তপ্ত হৈ থকাৰ মাজতে ভাৰতীয় জাতীয় কংগ্ৰেছৰ বাবে আহিছে এক বেয়া খবৰ। দলটোৰ সৈতে থকা ২৫ বছৰীয়া সম্পৰ্ক ছেদ কৰি আজি সকলো পদবী আৰু প্ৰাথমিক সদস্যপদৰ পৰা পদত্যাগ কৰে জ্যেষ্ঠ কংগ্ৰেছ নেতা জনচন জে চাংমাই। অসম প্ৰদেশ কংগ্ৰেছ কমিটীৰ সভাপতিৰ ওচৰলৈ প্ৰেৰণ কৰা এখন পদত্যাগ পত্ৰৰ জৰিয়তে তেওঁ এই সিদ্ধান্তৰ কথা ঘোষণা কৰে।
২০০১ চনতে কংগ্ৰেছত যোগদান কৰা চাংমাই বিগত দুই দশকতকৈও অধিক সময় ধৰি দলৰ বিভিন্ন দায়িত্ব পালন কৰি আহিছিল। ২০২১ চনৰ পৰা ২০২৬ চনলৈকে তেওঁ প্ৰদেশ কংগ্ৰেছৰ সংখ্যালঘু বিভাগৰ উপ-অধ্যক্ষ হিচাপে কাৰ্যনিৰ্বাহ কৰাৰ লগতে শেহতীয়াকৈ তেওঁক সম্পাদকৰ দায়িত্বও অৰ্পণ কৰা হৈছিল। সুদীৰ্ঘ ৰাজনৈতিক যাত্ৰাত দলৰ নেতৃত্ব আৰু সতীৰ্থসকলে আগবঢ়োৱা সমৰ্থনৰ বাবে তেওঁ কৃতজ্ঞতা প্ৰকাশ কৰে যদিও কি কাৰণত তেওঁ দল ত্যাগ কৰিছে, সেই বিষয়ে এতিয়ালৈকে ৰাজহুৱা কৰা নাই।
উল্লেখ্য যে ৰাজহুৱা সেৱাৰ ক্ষেত্ৰত চাংমাৰ এক সুকীয়া পৰিচয় আছে। ২০০৬ চনৰ পৰা ২০১০ চনলৈ তেওঁ ৰাভা হাছং স্বায়ত্তশাসিত পৰিষদৰ কাৰ্যবাহী সদস্য হিচাপে তৃণমূল পৰ্যায়ৰ উন্নয়নৰ বাবে কাম কৰিছিল। নিৰ্বাচনৰ প্ৰাকক্ষণত এইগৰাকী জ্যেষ্ঠ নেতাৰ পদত্যাগে দলীয় সাংগঠনিক ভেটিত কেনে প্ৰভাৱ পেলাব, সেই লৈ এতিয়া চৰ্চা আৰম্ভ হৈছে। বৰ্তমানৰ বাবে তেওঁক দলৰ সকলো দায়িত্বৰ পৰা অব্যাহতি দিবলৈ চাংমাই পদত্যাগ পত্ৰত অনুৰোধ জনাইছে।
