জে কে বৰুৱা স্মৃতি আন্তঃ জিলা ১৯ বছৰ অনুৰ্ধ্ব ক্ৰিকেট প্ৰতিযোগিতাৰ ফাইনেল ৰাউণ্ডৰ মেচ বৰপেটা আৰু গোৱালপাৰাত অনুষ্ঠিত হ’ব । লক্ষ্যনীয়ভাৱে অসম ক্ৰিকেট সন্থাৰ দ্বাৰা ইতিমধ্যে ‘জনেল’ মেচ সমুহ সমাপ্ত হোৱাৰ পাছত তাৰ পৰা চেম্পিয়ন হোৱা সূত্ৰে ফাইনেল ৰাউণ্ডত পদাৰ্পন কৰা মুঠ ৬ টা দলৰ মাজত দুটা গ্ৰুপ কৰি লীগ মেচ খেলোৱাৰ দিহা কৰা হৈছে ।
গ্ৰুপ ‘এ’ত খেলিব লগীয়া দল তিনিটা হৈছে বিশ্বনাথ, শিলচৰ আৰু বৰপেটা, বিপৰীতে ‘বি’ গ্ৰুপত খেলিব লগীয়া দল তিনিটা হৈছে, নাজিৰা, গোলাঘাট আৰু সভাপতি একাদশ। বৰপেটা ভ্যেনুত কাইলৈ প্ৰথম খন লীগ মেচত শিলচৰৰ বিৰুদ্ধে অৱতীৰ্ণ হ’ব বিশ্বনাথ।
বিপৰীতে গোৱালপাৰাত হ’ব লগীয়া ‘বি’ গ্ৰুপৰ প্ৰথম খন লীগ মেচত গোলাঘাটৰ বিপক্ষে যুজঁত নামিব সভাপতি একাদশে । উল্লেখযোগ্য যে ‘এ’ আৰু ‘বি’ গ্ৰুপৰ চেম্পিয়ন দল দুটাৰ মাজত অনুষ্ঠিত হ’ব ফাইনেল মেচ । অসম ক্ৰিকেট সংস্থাই প্ৰকাশ কৰা খেলৰ সূচী অনুসৰি প্ৰতিযোগিতাৰ ফাইনেল মেচ খন অনুষ্ঠিত হ’ব বৰপেটাত অহা ২৪ আগষ্টত ।
