দেশৰ নিৰাপত্তা ব্যৱস্থা অধিক সুৰক্ষিত কৰাৰ লক্ষ্যৰে ভাৰতীয় সেনাই নিজৰ জোৱান আৰু বিষয়াসকলৰ বাবে এক নতুন সামাজিক মাধ্যমৰ নিৰ্দেশনা জাৰি কৰিছে। বৃহস্পতিবাৰে জাৰি কৰা এই নিৰ্দেশনাত ইনষ্টাগ্ৰাম, হোৱাটছএপ, টেলিগ্ৰাম আৰু এক্সৰ দৰে জনপ্ৰিয় মাধ্যমসমূহ ব্যৱহাৰৰ ক্ষেত্ৰত কেতবোৰ কঠোৰ সীমা নিৰ্ধাৰণ কৰি দিয়া হৈছে। আধুনিক যুগৰ তথ্য যুদ্ধৰ প্ৰত্যাহ্বানৰ প্ৰতি লক্ষ্য ৰাখিয়েই সেনাই এই পদক্ষেপ গ্ৰহণ কৰা বুলি ধাৰণা কৰা হৈছে। নতুন নিৰ্দেশনা অনুসৰি, সেনাৰ কোনো সদস্যই এতিয়াৰে পৰা সামাজিক মাধ্যমত কোনো ধৰণৰ মন্তব্য বা নিজৰ ব্যক্তিগত মতামত প্ৰকাশ কৰিব নোৱাৰিব। তেওঁলোকে কেৱল তথ্য সংগ্ৰহ বা জ্ঞান আহৰণৰ উদ্দেশ্যহে এই প্লেটফৰ্মসমূহ ব্যৱহাৰ কৰিব পাৰিব। বিশেষকৈ ইউটিউব, এক্স আৰু ইনষ্টাগ্ৰামৰ দৰে এপত সক্ৰিয় অংশগ্ৰহণৰ পৰিৱৰ্তে কেৱল নিষ্ক্ৰিয়ভাৱে চকু ফুৰাবলৈহে অনুমতি দিয়া হৈছে।
স্কাইপ, হোৱাটছএপ বা চিগনেলৰ দৰে এপসমূহৰ জৰিয়তে কেৱল চিনাকি মানুহৰ সৈতেহে সাধাৰণ তথ্য আদান-প্ৰদান কৰিব পৰা যাব। কোনো অচিনাকি ব্যক্তিৰ সৈতে বাৰ্তালাপ কৰাৰ ক্ষেত্ৰত ব্যৱহাৰকাৰী গৰাকীয়েই সম্পূৰ্ণ সাৱধানতা অৱলম্বন কৰিব লাগিব। ইয়াৰ উপৰিও, নিজাকৈ কোনো ভিডিঅ’ বা মেচেজ আপলোড কৰাটো সম্পূৰ্ণৰূপে নিষিদ্ধ কৰা হৈছে। আনহাতে, লিংকডইনৰ দৰে পেছাদাৰী মাধ্যমসমূহ কেৱল নিজৰ বায়’ডাটা বা নিয়োগ সম্পৰ্কীয় তথ্যৰ বাবেহে ব্যৱহাৰ কৰিব পৰা যাব। সেনাই স্পষ্ট কৰি দিছে যে এই নিয়মসমূহ উলংঘা কৰিলে সংশ্লিষ্ট ব্যক্তিজনৰ বিৰুদ্ধে কঠোৰ ব্যৱস্থা গ্ৰহণ কৰা হ’ব। তথ্যৰ গোপনীয়তা ৰক্ষা কৰাটোৱে এই নিৰ্দেশনাৰ মূল উদ্দেশ্য।
