বহু চৰ্চিত ৱাকফ সংশোধনী বিধেয়কখন লোকসভাৰ পিছত ৰাজ্যসভাত গৃহীত হয়। বিধেয়কখনক ইউনাইটেড ৱাকফ মেনেজমেণ্ট এমপাৱাৰমেণ্ট, এফিচিয়েন্সি এণ্ড ডেভেলপমেণ্ট এক্ট, ১৯৯৫ বুলি কোৱা হয়। নতুন বিধেয়কখন ১৯৯৫ চনৰ ৱাকফ আইন সংশোধন কৰিবলৈ অনা হৈছে। নতুন বিধেয়কৰ ব্যৱস্থা অনুসৰি, যিজনে একেৰাহে পাঁচ বছৰ ধৰি ইছলাম ধৰ্ম পালন কৰিছে আৰু দান কৰা সম্পত্তিৰ গৰাকী হোৱাৰ অধিকাৰ আছে, তেওঁ দান কৰিব পাৰে। নতুন বিধেয়কখন জৰীপ কৰাৰ অধিকাৰ ৱাকফ আয়ুক্তৰ পৰিৱৰ্তে সংগ্ৰাহকক দিয়া হৈছে। চৰকাৰৰ দখলত থকা ৱাকফ সম্পত্তিক লৈ বিবাদৰ ক্ষেত্ৰত সংগ্ৰাহকৰ সিদ্ধান্ত কাৰ্যকৰী বুলি গণ্য কৰা হ’ব। এই বিধেয়ক অনুসৰি, ৱাকফ ন্যায়াধিকৰণৰ সিদ্ধান্ত চূড়ান্ত বুলি গণ্য কৰা নহ’ব। এই ব্যৱস্থাসমূহৰ বিৰুদ্ধে মুছলমান সংগঠন আৰু বিৰোধীৰ আপত্তি স্বত্বেও সংশোধনী বিধেয়কখন লোকসভাত গৃহীত হৈছিল।
বিৰোধীয়ে বিধেয়কখনক অসাংবিধানিক বুলি অভিহিত কৰিছে। লোকসভাৰ বিৰোধী দলপতি ৰাহুল গান্ধীয়ে ছ’চিয়েল মিডিয়া ছাইট এক্সত লিখিছে -এয়া সংবিধানৰ ওপৰত আক্ৰমণ। আজি মুছলমানসকলক লক্ষ্য কৰা হ’ব, কাইলৈ যিকোনো সমাজক লক্ষ্য কৰা হ’ব পাৰে। অৱশ্যে, বহুতো মুছলমান সংগঠনে এই নতুন সংশোধিত আইনক প্ৰত্যাহ্বান জনোৱাৰ বাবে ৰণনীতি তৈয়াৰ কৰি আছে। ৱাকফ সংশোধনী বিধেয়ক সন্দৰ্ভত উচ্চতম ন্যায়ালয়ৰ অধিবক্তা ফুজেল আহমেদ আয়ুবে কয় যে ৱাকফ ভূমি চৰকাৰৰ নহয়। বৰঞ্চ, ইয়াক দান কৰা ভূমি। কিন্তু চৰকাৰে এনেকুৱা উপস্থাপন কৰিছে যেন ৱাকফে চৰকাৰী ভূমি দখল কৰিছিল।
চৰকাৰী তথ্য অনুসৰি, ৱাকফৰ প্ৰায় ৯.৪ লাখ একৰ ভূমি আছে। যদি ইয়াক প্ৰতিৰক্ষা আৰু ৰে’ল মন্ত্ৰালয়ৰ সৈতে তুলনা কৰা হয়, ভূমিৰ ক্ষেত্ৰত ৱাকফ ভাৰতত তৃতীয় স্থানত আছে। প্ৰতিৰক্ষা মন্ত্ৰালয়ৰ ১৭.৯৫ লাখ একৰ ভূমি আছে, আনহাতে ৰে’লৱেৰ প্ৰায় ১২ লাখ একৰ ভূমি আছে। ইউপিএ চৰকাৰে ২০০৯ চনত এটা ৱামচি পৰ্টেল সৃষ্টি কৰিছিল। এই পৰ্টেলটোৱে ৱাকফ সম্পত্তিৰ ডাটাবেচ হিচাপে কাম কৰি আছে। চৰকাৰৰ মতে, ৱাকফৰ ৯.৪ লাখ একৰ ভূমি আছে।
