মুখ্যমন্ত্ৰী ডঃ হিমন্ত বিশ্ব শৰ্মাৰ ৫৬ সংখ্যক ওপজা দিনটো শদিয়াৰ পৰা ধুবুৰীলৈ অনুগামী সকলে কালি মাজনিশাৰ পাছৰে পৰা ব্যতিক্ৰমী ধৰণৰে পালন কৰা পৰিলক্ষিত হয়। আনকি মূখ্যমন্ত্ৰীৰ বহু অনুগামীয়ে ৩১ জানুৱাৰীৰ দিনা মাজনিশা বাৰ বজাৰ আগতেই জন্মদিনৰ শুভেচ্ছা জ্ঞাপন কৰাৰ বাবে দিছপুৰত চৰকাৰী বাসভৱনত ভীৰ কৰা পৰিলক্ষিত হয়। ইফালে জালুকবাৰী সমষ্টিৰ বিভিন্ন প্ৰান্তত মুখ্যমন্ত্ৰী গৰাকীৰ দীৰ্ঘজীৱন কামনা কৰি নাম – প্ৰসংগ, বন্তি প্ৰজ্বলন আদি কাৰ্য্যসূচী পালন কৰা হয়। তেনেদৰে ২০২৩ চনত সমষ্টি পুনৰ নিৰ্ধাৰণৰ পাছত জালুকবাৰীত নতুনকৈ অন্তৰ্ভুক্ত হোৱা আজাৰা ৰাজহ চক্ৰ আৰু জালুকবাৰী মৌজাৰ বিভিন্ন প্ৰান্ততো মুখ্যমন্ত্ৰীৰ অনুগামী সকলৰ উদ্যোগত জন্মদিন পালন কৰা হয়। ইয়াৰ ভিতৰত বিজেপিৰ অনুসূচীত জনজাতি মৰ্চাৰ সভাপতি আৰু উদ্যমী কৃষক বলেশ্বৰ ৰংপীয়ে মুখ্যমন্ত্ৰীৰ মঙ্গল আৰু দীৰ্ঘজীৱন কামনা কৰি আজিৰে পৰা দ্বিতীয়বাৰৰ বাবে বৰো ধানৰ খেতি আৰম্ভ কৰিছে। দীপৰ বিলৰ কাষৰীয়া অঞ্চল সমুহ মূখ্যমন্ত্ৰী ডঃ হিমন্ত বিশ্ব শৰ্মাই প্ৰতিনিধিত্ব কৰা জালুকবাৰী সমষ্টিত অন্তৰ্ভুক্ত হোৱাত বিজেপিৰ কাৰ্যকৰ্তা সকলৰ মাজত উৎসাহ – উদ্দীপনা বৃদ্ধি পোৱা পৰিলক্ষিত হৈছিল।
সেই উৎসাহৰ মাজতেই দেউচতালৰ নিজ ঘৰৰ সমীপত থকা গড়চুক – ৰাণীগেট সংযোগী পথৰ দাঁতিত আৰু আজাৰা- কামাখ্যা সংযোগী ৰেলপথৰ মাজত থকা তেঁওলোকৰ প্ৰায় পাঁচ বিঘা ম্যাদি পট্টাৰ মাটিত দ্বিতীয়বাৰৰ বাবে মূখ্যমন্ত্ৰীৰ দীৰ্ঘজীৱন কামনা কৰি বিগত বৰ্ষৰ দৰে এইবেলিও অলপ আগতীয়াকৈ বৰো ধানৰ খেতি আৰম্ভ কৰা বুলি সদৰি কৰিছে বলেশ্বৰ ৰংপী আৰু তেঁওৰ সহধৰ্মিনী তথা বিজেপি নেত্ৰী, আজাৰা গাওঁ পঞ্চায়তৰ প্ৰাক্তন সভানেত্ৰী কবিতা বড়ো ৰংপীয়ে। ইয়াৰ বাবে আগতেই গুৱাহাটীৰ ভৰলুমুখত থকা অসম চৰকাৰৰ কৃষি বিভাগৰ অনুমোদিত এখন বিপনীৰ পৰা প্ৰায় ২,৪০০ টকাৰে ছয় কেজি উন্নত মানৰ বৰো ধানৰ বীজ আনি শালি ধানৰ খেতিৰ দৰে তাৰো কঠীয়া সিচিছিল । মুখ্যমন্ত্ৰীৰ জন্মদিন উপলক্ষে কেবাজনো অভিজ্ঞ ৰোৱনীক লগত লৈ আজি পুৱা প্ৰথমতে যাৱতীয় পূজা অৰ্চনা কৰি তাৰ পাছত মাংগলিক কাৰ্যৰ মাজেৰে বলেশ্বৰ ৰংপী আৰু কবিতা বড়ো ৰংপীয়ে বৰো ধানৰ কঠীয়া ৰোৱা কাম আৰম্ভ কৰে।
এই পৰ্ব প্ৰায় এটা সপ্তাহ ধৰি চলিব । ইফালে বলেশ্বৰ ৰংপীয়ে সদৰি কৰা অনুসৰি ভাৰতৰ প্ৰধানমন্ত্ৰী নৰেন্দ্ৰ মোদীৰ আত্মনিৰ্ভৰ ভাৰত আৰু মুখ্যমন্ত্ৰীৰ আত্মনিৰ্ভৰ অসমৰ আহ্বানৰ প্ৰতি সহাৰি জনাই তেওঁ নিজকে আন কামৰ দৰে শালি আৰু বৰো ধানৰ খেতিত নিজকে নিয়োজিত কৰিছে । উল্লেখ্য যে বিগত ২০২৪ বৰ্ষৰ পহিলা ফেব্ৰুৱাৰীত প্ৰথমবাৰৰ বাবে বলেশ্বৰ ৰংপী আৰু তেঁওৰ পৰিয়ালবৰ্গই মুখ্যমন্ত্ৰীৰ জন্মদিনত অলপ আগতীয়াকৈ বৰো ধানৰ ৰোপণ কাৰ্য আৰম্ভ কৰিছিল । এই বিষয়ে সংবাদ মাধ্যমযোগে প্ৰচাৰ হোৱাৰ পাছত বিগত স্বাধীনতা দিৱসৰ সময়ত মুখ্যমন্ত্ৰী ডঃ হিমন্ত বিশ্ব শৰ্মাই তেওঁক উৎসাহিত কৰাৰ বাবে এখন প্ৰশস্তি পত্ৰ প্রেৰণ কৰিছিল। ইফালে বৰো ধানৰ খেতি আৰম্ভ কৰাৰ পাছত আজি বলেশ্বৰ ৰংপীয়ে পূৰ্ব নিৰ্ধাৰিত সূচী অনুসৰি কেবাজনো বন্ধুৰ সৈতে উত্তৰ প্ৰদেশৰ প্ৰয়াগৰাজত চলি থকা মহা কুম্ভমেলাত স্নান কৰাৰ উদ্দেশ্যৰে গুৱাহাটীৰ পৰা দূপৰীয়া ৰেলযোগে যাত্ৰা কৰা বুলি জানিবলৈ দিছে।
