নাছাৰ গৱেষণা আৰু মহাকাশ অভিযানৰ ক্ষেত্ৰত এক নতুন মাত্ৰা প্ৰদান কৰি কেলিফৰ্ণিয়াৰ এমেছ ৰিচাৰ্চ চেণ্টাৰত শেহতীয়াকৈ কাৰ্যক্ষম কৰি তোলা হৈছে বিশ্বমানৰ ছুপাৰ কম্পিউটাৰ ‘এথেনা’। কেলিফৰ্ণিয়াৰ ছিলিকন ভেলীস্থিত নাছাৰ এমেছ ৰিচাৰ্চ চেণ্টাৰত থকা মডিউলাৰ ছুপাৰ কম্পিউটিং ফেচিলিটিত অৱস্থিত এই ব্যৱস্থাটোৱে বৰ্তমানৰ প্লেইডেছ আৰু আইটকেনৰ দৰে ছুপাৰ কম্পিউটাৰতকৈও অধিক কম্পিউটিং শক্তি তথা কাৰ্যক্ষমতা প্ৰদান কৰে। যোৱা জানুৱাৰী মাহত বিটা পৰীক্ষণৰ সফলতাৰ পিছত সম্প্ৰতি এই ব্যৱস্থাটো সংস্থাটোৰ বিজ্ঞানী আৰু অভিযন্তাসকলৰ বাবে সম্পূৰ্ণৰূপে মুকলি কৰা হৈছে। প্ৰতি ছেকেণ্ডত ২০ পেটাফ্লপতকৈও অধিক গণনা কৰিব পৰা এথেনাই নাছাৰ ৰকেট উৎক্ষেপণৰ চিমুলেচন, পৰৱৰ্তী প্ৰজন্মৰ বিমানৰ আৰ্হি প্ৰস্তুত আৰু বৃহৎ পৰিসৰৰ কৃত্ৰিম বুদ্ধিমত্তাৰ মডেল প্ৰশিক্ষণৰ বাবে প্ৰয়োজনীয় শক্তি যোগান ধৰিব। সংস্থাটোৰ হাই-এণ্ড কম্পিউটিং কেপেবিলিটি পৰ্টফলিঅ’ৰ মুৰব্বী কেভিন মাৰ্ফীয়ে জনোৱা মতে, অন্বেষণে নাছাক সদায় গণনাগত সম্ভাৱনাৰ শেষ প্ৰান্তলৈ লৈ গৈছে আৰু এই নতুন ব্যৱস্থাটোৱে অভিযানৰ বিৱৰ্তনশীল প্ৰয়োজনীয়তা পূৰণত সহায় কৰিব।
উল্লেখযোগ্য যে, ২০২৫ চনৰ মাৰ্চ মাহত এক প্ৰতিযোগিতাৰ জৰিয়তে নিৰ্বাচিত হোৱা গ্ৰীক দেৱী এথেনাৰ নামেৰে এই ছুপাৰ কম্পিউটাৰটোৰ নামাকৰণ কৰা হয়। কেৱল নাছাৰ অভ্যন্তৰীণ বিজ্ঞানীয়েই নহয়, বৰঞ্চ সংস্থাটোৰ কাৰ্যসূচীত সহায় কৰা বাহ্যিক গৱেষকসকলেও সময়ৰ আবেদনৰ জৰিয়তে এই ব্যৱস্থাটো ব্যৱহাৰ কৰিব পাৰিব। নাছাৰ মুখ্য বিজ্ঞান তথ্য বিষয়াৰ কাৰ্যালয়ে এই সমগ্ৰ কম্পিউটিং পৰ্টফলিঅ’ পৰিচালনা কৰিছে, যিয়ে বাণিজ্যিক ক্লাউড প্লেটফৰ্মৰ দৰে আধুনিক প্ৰযুক্তিৰ সৈতে ছুপাৰ কম্পিউটাৰক একত্ৰিত কৰি এটা নমনীয় হাইব্ৰিড পদ্ধতি সমৰ্থন কৰে। বিশ্বব্ৰহ্মাণ্ডৰ অধিক গভীৰলৈ অন্বেষণ চলোৱাৰ বাবে দ্ৰুত আৰু বুদ্ধিমান গণনাৰ ক্ষমতা বৰ্তমানৰ সময়ত অধিক অপৰিহাৰ্য বুলি সংস্থাটোৱে মত প্ৰকাশ কৰে।
