সুদীৰ্ঘ ৩৬ বছৰীয়া নিৰ্বাসিত জীৱনৰ যন্ত্ৰণাৰ অন্তত কাশ্মীৰী পণ্ডিতসকলক নিজ গৃহলৈ ঘূৰাই অনাৰ বাবে এতিয়া উপত্যকাটোত এক আৱেগিক পৰিৱেশৰ সৃষ্টি হৈছে। পিপলছ ডেম’ক্ৰেটিক পাৰ্টিৰ প্ৰধান মেহবুবা মুফতীয়ে মঙলবাৰে স্পষ্টকৈ কয় যে কাশ্মীৰী পণ্ডিতসকলৰ অবিহনে কাশ্মীৰ সদায় আধৰুৱা আৰু তেওঁলোকৰ সন্মানেৰে প্ৰত্যাৱৰ্তনৰ বাবে উপত্যকাবাসীয়ে অধীৰ আগ্ৰহেৰে অপেক্ষা কৰিছে।
গান্ধী নগৰস্থিত পি ডি পিৰ মুখ্য কাৰ্যালয়ত সংবাদ মাধ্যমৰ সৈতে হোৱা বাৰ্তালাপত প্ৰাক্তন মুখ্যমন্ত্ৰীগৰাকীয়ে কয় যে কাশ্মীৰী পণ্ডিতসকলে নিজৰ ভৱিষ্যতৰ সিদ্ধান্ত নিজে লোৱা উচিত। ১৯ জানুৱাৰীত নিৰ্বাসিত জীৱনৰ ৩৬ বছৰ সম্পূৰ্ণ হোৱাৰ পৰিপ্ৰেক্ষিতত কাশ্মীৰী পণ্ডিতসকলে চলোৱা প্ৰতিবাদৰ সন্দৰ্ভত সোধা এক প্ৰশ্নৰ উত্তৰত মেহবুবাই কয়, “তেওঁলোক আমাৰ ভাতৃ, আমি বিচাৰোঁ তেওঁলোক মৰ্যাদা সহকাৰে আমাৰ মাজলৈ ঘূৰি আহক আৰু আমি একেলগে বসবাস কৰোঁ যাতে কাশ্মীৰ পুনৰ সম্পূৰ্ণ হৈ উঠে।” শেহতীয়াকৈ উপ-ৰাজ্যপাল মনোজ সিনহাক সাক্ষাৎ কৰি মেহবুবা মুফতীয়ে বিধানসভাত কাশ্মীৰী পণ্ডিতসকলৰ বাবে আসন সংৰক্ষণৰ এক গুৰুত্বপূৰ্ণ পৰামৰ্শ আগবঢ়ায়। তেওঁ কয় যে কেৱল মনোনীত সদস্যৰ পৰিৱৰ্তে বিধানসভাত দুখন আসন এই সম্প্ৰদায়টোৰ বাবে সংৰক্ষিত হ’ব লাগে। মেহবুবাৰ মতে, “তেওঁলোক নিৰ্বাচনত থিয় হওক, ভোট বিচাৰক আৰু মুছলমানসকলে তেওঁলোকক ভোট দি জয়ী কৰক। ইয়াৰ দ্বাৰাহে দুয়োটা সম্প্ৰদায়ৰ মাজত প্ৰকৃত একতা গঢ়ি উঠিব।” মনোনয়নৰ জৰিয়তে মুম্বাই বা অন্য ঠাইত বহি থকা ব্যক্তিক বিধানসভালৈ অনাৰ প্ৰক্ৰিয়াই এই সম্প্ৰদায়টোৰ প্ৰকৃত স্বাৰ্থ সুৰক্ষিত নকৰে বুলিও মেহবুবাই মন্তব্য কৰে। তেওঁৰ মতে, পণ্ডিতসকলৰ সক্ৰিয় অংশগ্ৰহণ আৰু তেওঁলোকৰ পুনৰ সংস্থাপনৰ জৰিয়তেহে কাশ্মীৰৰ হেৰোৱা ঐতিহ্য ঘূৰি অহাটো সম্ভৱ।
