ট্ৰাই (TRAI)-ৰ ড্ৰাইভ টেষ্টত অসমৰ প্ৰধান ঘাইপথ কৰিডৰত মোবাইল নেটৱৰ্কৰ কাৰ্যক্ষমতা প্ৰদৰ্শিত

টেলিকম ৰেগুলেটৰী অথৰিটি অৱ ইণ্ডিয়া চমুকৈ ট্ৰাই-এ অসমৰ ২৭নং আৰু ৬২৭নং ৰাষ্ট্ৰীয় ঘাইপথৰ লংকা-নাৰায়ণপুৰ ৰে’লৱে ব্ৰীজ অংশত চলোৱা এক স্বতন্ত্ৰ ড্ৰাইভ টেষ্ট (আইডিটি)ৰ ফলাফল প্ৰকাশ কৰিছে, য’ত এই অঞ্চলটোৰ টেলিকম অপাৰেটৰসকলে প্ৰদান কৰা মোবাইল নেটৱৰ্ক সেৱাৰ গুণগত মান মূল্যায়ন কৰা হৈছে।
২০২৬ চনৰ ১০ মাৰ্চৰ পৰা ১৮ মাৰ্চৰ ভিতৰত চলোৱা এই ড্ৰাইভ টেষ্টত অসম লাইচেঞ্চপ্ৰাপ্ত সেৱা এলেকা (এলএছএ)ৰ অধীনত প্ৰায় ১৯০ কিলোমিটাৰ ঘাইপথ আৰু ৭টা হটস্পট স্থান সামৰি লোৱা হৈছিল। এই অনুশীলনে ২জি, ৩জি, ৪জি আৰু ৫জি নেটৱৰ্কত কভাৰেজ, কল ড্ৰপৰ হাৰ, কল ছেটআপৰ সফলতাৰ হাৰ, কথা-বতৰাৰ গুণগত মান আৰু মোবাইল ডাটা স্পীডকে ধৰি গুৰুত্বপূৰ্ণ সেৱাৰ গুণগত মান (কিউঅ’এছ)ৰ মাপকাঠিসমূহ মূল্যায়ন কৰিছিল।
প্ৰতিবেদন অনুসৰি, ৰিলায়েন্স জিঅ’ই সৰ্বাধিক ৮৮.২১ এমবিপিএছ গড় ডাউনলোড স্পীড দিবলৈ সক্ষম হৈছে, ইয়াৰ পিছতে এয়াৰটেলে ৬৬.৫০ এমবিপিএছ দিবলৈ সক্ষম হৈছে। ভোডাফোন আইডিয়া(ভিআইএল)ই ১৬.৮৪ এমবিপিএছ লাভ কৰাৰ বিপৰীতে বিএছএনএলে ৪.৮৬ এমবিপিএছ গতি দিবলৈ সক্ষম হৈছে। আপলোড স্পীডৰ ক্ষেত্ৰত এয়াৰটেলে ১৩.৬৩ এমবিপিএছেৰে শীৰ্ষত থকাৰ বিপৰীতে জিঅ’ই ৬.৬১ এমবিপিএছ, ভিআইএলে ৩.৯৯ এমবিপিএছ আৰু বিএছএনএলে ৩.১০ এমবিপিএছ গতি প্ৰদান কৰিবলৈ সক্ষম হৈছে।
এই প্ৰতিবেদনত সকলো অপাৰেটৰৰে কভাৰেজৰ অভাৱ আৰু কল ড্ৰপৰ সমস্যাও প্ৰকাশ কৰা হৈছে। এয়াৰটেলৰ ৯টা, বিএছএনএলৰ ১২টা, জিঅ’ৰ ১৪টা আৰু ভিআইএলৰ ২১টা কল ড্ৰপ হোৱাৰ তথ্য পোৱা গৈছে। বামুণগাঁও, দিজাবৰা, মুপা, দিদাওদীপ, ৰেটজল আৰু ডামচৰাৰ মাজেৰে পাৰ হৈ যোৱা অংশসমূহক সামৰি এই পথটোৰ কেইবাটাও স্থানত নেটৱৰ্ক কভাৰেজৰ প্ৰত্যাহ্বান প্ৰত্যক্ষ কৰা হৈছে।
এই ফলাফলসমূহ অসমৰ পৰিবহন নেটৱৰ্কত নিৰ্ভৰযোগ্য সংযোগৰ ওপৰত নিৰ্ভৰ কৰা ব্যৱসায়ী, লজিষ্টিক অপাৰেটৰ, ডিজিটেল সেৱা প্ৰদানকাৰী আৰু গ্ৰাহকসকলৰ বাবে গুৰুত্বপূৰ্ণ। প্ৰধান ঘাইপথসমূহৰ কাষে কাষে উন্নত টেলিকম কাৰ্যক্ষমতাই মসৃণ ডিজিটেল লেনদেন, ই-কমাৰ্চৰ বিকাশ আৰু ব্যৱসায়িক যোগাযোগত সহায় কৰিব পাৰে, যাৰ ফলত গুৱাহাটী আৰু সমগ্ৰ উত্তৰ-পূবৰ অন্যান্য বাণিজ্যিক কেন্দ্ৰসমূহৰ মাজত অৰ্থনৈতিক সম্পৰ্ক শক্তিশালী হ’ব।
ট্ৰাইয়ে কয় যে, এই তথ্যসমূহ প্ৰয়োজনীয় সংশোধনী ব্যৱস্থা আৰু সেৱাৰ উন্নতিৰ বাবে টেলিকম অপাৰেটৰৰ সৈতে ভাগ-বতৰা কৰা হৈছে।