গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত নতুনকৈ মুকলি কৰা টাৰ্মিনেল ২ৰ পৰা এয়াৰ ইণ্ডিয়া আৰু এয়াৰ ইণ্ডিয়া এক্সপ্ৰেছৰ বিমান সেৱা আৰম্ভ কৰি অঞ্চলটোৰ বিমান সংযোগ উন্নত কৰাৰ ক্ষেত্ৰত এক গুৰুত্বপূৰ্ণ পদক্ষেপ হিচাপে পৰিগণিত হৈছে। নতুন টাৰ্মিনেলত অৱতৰণ কৰা প্ৰথমখন এয়াৰ ইণ্ডিয়াৰ বিমান আছিল দিল্লীৰ পৰা এআই ৮৭৯। ইয়াৰ পিছত একেখন বিমানেই এআই ৮৮০ ৰূপে যাত্ৰা আৰম্ভ কৰে আৰু টাৰ্মিনেল ২ৰ পৰা বিমান সংস্থাটোৰ প্ৰথমখন উৰণৰ বাবে বহিৰ্গামী বিমান হিচাপে পৰিগণিত হয়। আনহাতে, ইয়াৰ কিছু সময়ৰ পিছতে এয়াৰ ইণ্ডিয়া এক্সপ্ৰেছেও নতুন টাৰ্মিনেলত কলকাতাৰ পৰা অহা আইএক্স ১৫১৭ বিমানখনে অৱতৰণ কৰে, ইয়াৰ পিছত ইম্ফললৈ যাত্ৰা অব্যাহত ৰাখে বিমানখনে।
বৰ্তমান এয়াৰ ইণ্ডিয়াই দিল্লী আৰু গুৱাহাটীৰ মাজত দৈনিক দুখনকৈ বিমান সেৱা অব্যাহত ৰাখিছে। আনহাতে এয়াৰ ইণ্ডিয়া এক্সপ্ৰেছে দৈনিক মুঠ ১৭খন বিমানেৰে গুৱাহাটীক ৯খন চহৰৰ সৈতে সংযোগ কৰে। এয়াৰ ইণ্ডিয়াৰ বিষয়াসকলে কয় যে নতুন টাৰ্মিনেললৈ স্থানান্তৰিত হোৱাৰ ফলত যাত্ৰীৰ পৰিচালনা আৰু সামগ্ৰিক ভ্ৰমণ অভিজ্ঞতা উন্নত হোৱাৰ সম্ভাৱনা আছে।
উন্মোচনী অনুষ্ঠানত স্থানীয় সংস্কৃতিকো তুলি ধৰাৰ প্ৰয়াস কৰা হৈছে। নতুন টাৰ্মিনেল অভিমুখী প্ৰথমখন এয়াৰ ইণ্ডিয়াৰ বিমানৰ যাত্ৰীক অনব’ৰ্ডত পৰম্পৰাগত অসমীয়া মিঠাই, নাৰিকলৰ লাৰুৰে পৰিবেশন কৰা হৈছিল। টাৰ্মিনেল ২ত চেক ইন কৰা প্ৰথম যাত্ৰীজনক সন্মান আৰু আতিথ্যৰ চিন স্বৰূপে অসমীয়াৰ স্বাভিমান গামোচাৰে আদৰণি জনোৱা হয়।
অসমৰ মুখ্যমন্ত্ৰী হিমন্ত বিশ্ব শৰ্মাই এলজিবিআই বিমানবন্দৰৰ নৱনিৰ্মিত টাৰ্মিনেল ২ত এয়াৰ ইণ্ডিয়াৰ উদ্বোধনী বিমান অৱতৰণৰ ভিডিঅ’ শ্বেয়াৰ কৰি ছ’চিয়েল মিডিয়াত যথেষ্ট প্ৰশংসা কৰিছে।
এক্সত ভিডিঅ’টো শ্বেয়াৰ কৰি মুখ্যমন্ত্ৰীয়ে কয় যে, “এয়াৰ ইণ্ডিয়াৰ উদ্বোধনী বিমানখন লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰৰ নতুন টাৰ্মিনেলত অৱতৰণ কৰিলে, য’ত আতিথ্যই নতুন মাত্ৰা লাভ কৰিলে। যাত্ৰীসকলক অসমৰ সংস্কৃতি, ভাষা আৰু পৰম্পৰাৰে চিনাকী কৰি দিয়া হৈছিল আৰু নাৰিকল লাৰু পৰিৱেশন কৰা হৈছিল।”
#AwesomeAssam হেশ্বটেগ ব্যৱহাৰ কৰি ড০ হিমন্ত বিশ্ব শৰ্মাই ভ্ৰমণকাৰীসকলক ৰাজ্যখনৰ বৈচিত্ৰ্যময় পৰ্যটনৰ অফাৰসমূহ অন্বেষণ কৰিবলৈ আমন্ত্ৰণ জনায়। “ছুটীৰ পৰিকল্পনা কৰক, সেউজ অৰণ্য, সমৃদ্ধ উদ্ভিদ আৰু প্ৰাণী, চাহ বাগিচা অন্বেষণ কৰক আৰু #AwesomeAssamৰ সজীৱ সংস্কৃতি আৰু খাদ্যৰ অভিজ্ঞতা লাভ কৰক,” তেওঁ এইদৰে আহ্বান জনায়।
