অসমত বসবাস কৰা অবৈধ বাংলাদেশী মুছলমানৰ সংখ্যা সন্দৰ্ভত চলি থকা বিতৰ্কৰ মাজতে এতিয়া এআইইউডিএফৰ বিধায়ক আমিনুল ইছলামে এক চাঞ্চল্য্যকৰ দাবী উত্থাপন কৰিছে। সোমবাৰে সংবাদ মাধ্যমৰ সৈতে হোৱা বাৰ্তালাপত বিধায়কগৰাকীয়ে স্পষ্টকৈ কয় যে যদিহে ঘৰে ঘৰে গৈ এটা সঠিক জৰীপ চলোৱা হয়, তেন্তে ৰাজ্যখনত এহেজাৰতকৈ অধিক অবৈধ বিদেশী নোলাব। বছৰ বছৰ ধৰি বিভিন্ন চৰকাৰী প্ৰক্ৰিয়াৰ জৰিয়তে মুছলমান লোকসকলৰ নাগৰিকত্ব ইতিমধ্যে বাৰে বাৰে পৰীক্ষা কৰা হৈছে বুলিও তেওঁ মন্তব্য কৰে।
ইছলামৰ মতে ৰাষ্ট্ৰীয় নাগৰিকপঞ্জী চমুকৈ এনআৰচিৰ সময়ত মুছলমান সম্প্ৰদায়ৰ লোকসকলে আটাইতকৈ বেছি হাৰাশাস্তি আৰু পৰীক্ষাৰ সন্মুখীন হৈছে। এনআৰচিৰ খচৰাৰ পৰা বাদ পৰা ১৯ লাখ লোকৰ ভিতৰত প্ৰায় ১২ লাখেই অ-মুছলমান আছিল আৰু মাত্ৰ ৬ ৰ পৰা ৭ লাখ লোকহে মুছলমান সম্প্ৰদায়ৰ আছিল বুলি তেওঁ সোঁৱৰাই দিয়ে। তেওঁ গুৰুত্ব আৰোপ কৰে যে এনআৰচিৰ পৰা বাদ পৰা মানেই কোনো লোক বিদেশী হোৱাটো নুবুজায়, কাৰণ আইনী প্ৰক্ৰিয়াৰ জৰিয়তে বিদেশী ন্যায়াধিকৰণত নথি-পত্ৰ দাখিল কৰাৰ পাছত প্ৰায় ৯০ শতাংশ লোকেই ভাৰতীয় নাগৰিক হিচাপে প্ৰমাণিত হ’ব।
ৰাজনৈতিক মুনাফাৰ বাবে বিদেশী সমস্যাটোক লৈ অতিৰঞ্জিত চৰ্চা চলাই থকা বুলিও বিধায়কগৰাকীয়ে তীব্ৰ সমালোচনা কৰে। নাগৰিকত্বৰ নথি-পত্ৰ বাৰে বাৰে পৰীক্ষা কৰাৰ পাছতো কিয় একেটা বিষয়কে লৈ বিতৰ্ক সৃষ্টি কৰা হয় তাক লৈও তেওঁ প্ৰশ্ন উত্থাপন কৰে। অসমৰ নিৰ্বাচনী ৰাজনীতিৰ কেন্দ্ৰবিন্দু হৈ থকা অনুপ্ৰৱেশকাৰীৰ বিষয়টোত আমিনুল ইছলামৰ এই স্থিতিয়ে এতিয়া নতুন ৰাজনৈতিক প্ৰতিক্ৰিয়াৰ সৃষ্টি কৰিছে।
