মন আছিল বিৰাট কোহলীৰ ৰেষ্টুৰেণ্টলৈ গৈ ভালকৈ এসাজ খোৱাৰ। কিন্তু এই আশা পূৰণ নহ’ল এজন যুৱকৰ। ভাৰতীয় তাৰকা ক্ৰিকেটাৰ বিৰাট কোহলীৰ ৰেষ্টুৰেণ্টত প্ৰৱেশ কৰিবলৈ দিয়া নহ’ল যুৱকজনক। ছ’চিয়েল মিডিয়াত এটা ভিডিঅ’ বিয়পি পৰাৰ লগে লগে আৰম্ভ হৈছে তীব্ৰ বিতৰ্ক।
কিন্তু কিয় বাধা দিয়া হ’ল তামিল যুৱকৰ প্ৰৱেশত? ভিডিঅ’টোত তেওঁ নিজেই সেই কথা কৈছিল। যুৱকজনে ক’লে, তেওঁ মুম্বাইলৈ আহি এখন ফাইভ ষ্টাৰ হোটেলত আছিল। ইয়াৰ পিছত তেওঁ কোনো সময় নষ্ট নকৰাকৈ জুহুলৈ ৰাওনা হয়। উদ্দেশ্য প্ৰিয় তাৰকা কোহলীৰ One8 Commune ৰেষ্টুৰেণ্টত খোৱা। কিন্তু প্ৰৱেশদ্বাৰত বাধা দিয়া হয় যুৱকজনক। যুৱকজনে ধূতি পিন্ধি থকাৰ বাবে ৰেষ্টুৰেণ্টত প্ৰৱেশ কৰিবলৈ নিদিয়াৰ অভিযোগ উত্থাপন কৰে। ৰেষ্টুৰেণ্টৰ কৰ্মচাৰীয়ে কয় যে তেওঁক এই পোছাক পিন্ধি প্ৰৱেশ কৰিবলৈ দিয়া নহ’ব।
নেট জগতত ভাইৰেল হোৱা ছবিখনত দেখা গৈছে যে যুৱকজনে এখন বগা ধূতি আৰু বগা চাৰ্ট পিন্ধিছে। তামিলনাডুত সাধাৰণতে পুৰুষক এই পোছাক পৰিধান কৰা দেখা যায়। তাত ধূতি পিন্ধাটো বেছি সাধাৰণ। কিন্তু সেই পোছাক পিন্ধি তেওঁক মুম্বাইৰ কোহলীৰ ৰেষ্টুৰেণ্টত প্ৰৱেশ কৰিবলৈ দিয়া নহ’ল। এই ভিডিঅ’টো ছ’চিয়েল মিডিয়াত প্ৰকাশ পোৱাৰ পিছতে আৰম্ভ হয় বিতৰ্ক। বহুতে ৰেষ্টুৰেণ্টখনৰ বিৰুদ্ধে ক্ষোভ প্ৰকাশ কৰে। আন কিছুমানে দাবী কৰে যে বহু ৰেষ্টুৰেণ্টত ড্ৰেছ কোড আছে। সেই অনুসৰি কৰ্মচাৰীসকলক নিৰ্দেশ দিয়া হয়। কোনো জাতিৰ সাংস্কৃতিক আৱেগক আঘাত দিয়াৰ প্ৰশ্নই উত্থাপন নহয়।
অৱশ্যে যুৱকজনৰ অভিযোগ সঁচা নে নহয় সেই সন্দৰ্ভত এতিয়াও কোনো সঁহাৰি দিয়া নাই কোহলীৰ ৰেষ্টুৰেণ্টে। মন কৰিবলগীয়া যে ইয়াৰ পূৰ্বে কলকাতাকে ধৰি কেইবাখনো চহৰত ডাইনাৰ্ছক কাপোৰৰ বাবে ৰেষ্টুৰেণ্টত প্ৰৱেশ কৰাত বাধা দিয়াৰ বিষয়টো শিৰোনামত আহিছিল। এই বিতৰ্কত কোহলীৰ নামো সোমাই পৰিল।
