ইজৰাইল আৰু হামাছৰ যুদ্ধই দুসপ্তাহ অতিক্ৰম কৰিছে। ইফালে ৰাষ্ট্ৰীয় স্বয়ংসেৱক সংঘৰ মুৰব্বী মোহন ভাগৱতে এই যুদ্ধ সন্দৰ্ভত মন্তব্য কৰিছে। আৰ এছ এছৰ মুৰব্বী মোহন ভাগৱতে কয় যে হিন্দু ধৰ্মই সকলো সম্প্ৰদায়ক সন্মান কৰে আৰু যিবোৰ বিষয়ৰ বাবে আজি হামাছ আৰু ইজৰাইলৰ মাজত যুদ্ধ চলি আছে সেইবোৰ বিষয়ত ভাৰতত কেতিয়াও যুঁজ হোৱা নাছিল।
পিটিআই সংস্থাৰ তথ্য অনুসৰি মোহন ভাগৱতে ছাত্ৰপতি শিৱাজী মহাৰাজৰ ৰাজ অভিষেকৰ ৩৫০ বছৰ সম্পূৰ্ণ হোৱাৰ উপলক্ষে ইয়াৰ এখন বিদ্যালয়ত আয়োজন কৰা এক কাৰ্যসূচীত ভাষণ দিয়ে। ভাগৱতে আৰু কয় যে এই দেশত এনে এক ধৰ্ম আৰু সংস্কৃতি আছে যিয়ে সকলো সম্প্ৰদায় আৰু ধৰ্মক সন্মান কৰে। সেইটোৱেই হৈছে হিন্দু ধৰ্ম, এইখন হিন্দুৰ দেশ। ইয়াৰ অৰ্থ এইটো নহয় যে আমি আন সকলো (ধৰ্ম) প্ৰত্যাখ্যান কৰো।
আৰ এছ এছৰ মুৰব্বীগৰাকীয়ে আৰু কয় যে ইয়াত হিন্দু বুলি ক’লে মুছলমানকো নিৰাপত্তা দিয়া হৈছে বুলি কোৱাৰ প্ৰয়োজন নাই। কেৱল হিন্দুসকলেহে এই কাম কৰে। কেৱল ভাৰতেহে এই কাম কৰে। আন দেশত এনে নহয়। মোহন ভাগৱতে কয় যে সকলোতে সংগ্ৰাম চলি আছে। ইউক্ৰেইন যুদ্ধ, হামাছ-ইজৰাইল যুদ্ধৰ কথা নিশ্চয় শুনিছে। এনে বিষয়ত আমাৰ দেশত কেতিয়াও যুদ্ধ হোৱা নাই। শিৱাজী মহাৰাজৰ সময়ত যি আক্ৰমণ সংঘটিত হৈছিল সেয়া একে ধৰণৰ আছিল যদিও এই বিষয়ত আমি কেতিয়াও কাৰো লগত যুঁজ দিয়া নাছিলো, সেইবাবেই আমি হিন্দু।
এতিয়ালৈকে গাজাত ইজৰাইলৰ বিমান আক্ৰমণত ৪৩৮৫ জন পেলেষ্টাইনী লোকৰ মৃত্যু হৈছে। ৭ অক্টোবৰত হামাছে ইজৰাইলত প্ৰৱেশ কৰি ৰকেটেৰে আক্ৰমণ কৰে। এই আক্ৰমণত ১৪০০ৰো অধিক লোকে প্ৰাণ হেৰুৱায়। আক্ৰমণৰ পিছতহে আৰম্ভ হৈছিল ইজৰাইল-হামাছ যুদ্ধ। ইজৰাইলে কয় যে হামাছক সম্পূৰ্ণৰূপে ধ্বংস কৰিব।
